Michel: Kosova dhe Serbia t’i zgjidhin mospajtimet – s’ka kohë për kriza dhe turbulenca të reja

Presidenti i Këshillit Evropian (KE), Charles Michel, ka paralajmëruar se në samitin joformal të Bashkimit Evropian (BE) në Granada të Spanjës, sikurse edhe në samitin e Komunitetit Politik Evropian (EPC) të enjten, situata aktuale në Kosovë dhe zgjerimi i BE-së do të jenë ndër temat kryesore që do të preken nga liderët evropianë.

Në një përgjigje për Radio Televizionin e Serbisë (RTS), ai ka thënë se po bëhen përpjekje diplomatike për të bindur liderët në rajon se “dialogu dhe stabiliteti janë çështje për të cilat duhet të punojnë”, kurse duke iu referuar rrjedhës së tensionuar në raportet Kosovë – Serbi, ka paralajmëruar se do të ketë diskutime mes liderëve për situatën aktuale.

“Ne po punojmë ngushtë me Shtetet e Bashkuara të Amerikës (SHBA) dhe NATO-n, për të përcjellë një mesazh të qartë se nuk ka kohë për kriza dhe turbulenca të reja. Tani është koha për të kapur mundësinë për përparim drejt BE-së”, ka thënë Michel, derisa ka shtuar se Kosova dhe Serbia duhet t’i zgjidhin “mospajtimet dypalëshe” për ta kapur këtë shans.

“Për përparimin e Ballkanit Perëndimor, sundimi i ligjit dhe reformat ekonomike janë të nevojshme, por është po aq e rëndësishme që të zgjidhen mosmarrëveshjet dypalëshe, jo vetëm ndërmjet Kosovës dhe Serbisë. Shpresoj që liderët e rajonit të kuptojnë se ekziston një mundësi që duhet përdorur”, ka theksuar Michel.

Më 5 tetor pritet të mbahet samiti i tretë i EPC-së, ku liderët e 44 vendeve evropiane, përfshirë presidenten e Kosovës, Vjosa Osmani, do të diskutojnë për sigurinë, energjinë dhe çështje të tjera me interes për të gjithë kontinentin. Në margjinat e kësaj ngjarje politike, prezent pritet të jetë edhe Aleksandër Vuçiç, presidenti i Serbisë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.