Mexhiti pas takimit me Kurtin: Diskutuam për forcimin e bashkëpunimit mes dy shteteve

Zëvendëskryeministri i parë i Maqedonisë së Veriut, Izet Mexhiti, pas takimit e kryeministrin e Kosovës, Albin Kurti në Shkup, ka thënë temë kryesore ka qenë forcimi i lidhjeve mes dy shteteve.

“Me kënaqësi të veçantë mirëpritëm Kryeministrin e Kosovës, Albin Kurti, në një vizitë pune, të frytshme, konstruktive, por edhe vëllazërore. Diskutuam çështje të rëndësishme për forcimin e bashkëpunimit ndërmjet dy shteteve tona me fokus të veçantë tek lidhjet tona të forta, të cilat synojmë t’i forcojmë edhe më tej”, ka shkruar ai në Facebook.

Mexhiti, ka theksuar se ky takim shënon edhe një hap të rëndësishëm për të ardhmen e përbashkët të regjionit, duke demonstruar bashkëpunimin e ngushtë dhe të suksesshëm mes Maqedonisë së Veriut dhe Republikës së Kosovës.

“Përmes këtij bashkëpunimi, synojmë të përmirësojmë pozitën e tonë në nivel rajonal dhe ndërkombëtar. Mirë se erdhe, kryeministër”, shtoi ai.

Ndryshe, në Qeverinë e Maqedonisë së Veriut bën pjesë edhe koalicioni i partive shqiptare “VLEN” që u mbështet nga kryeministri i Kosovës kundër Bashkimit Demokratik për Integrim (BDI).

Vizita e Kurtit në RMV realizohet në kohën e tensioneve diplomatike midis dy shteteve, përkatësisht pas incidentit të fundit në Aeroportin e Shkupit, ku është përfshirë presidentja kosovare, Vjosa Osmani, incident që autoritetet e cilësuan “sulm” ndaj Kosovës.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.