Metsola: Shtensionimi në Veri duhet të ndodhë

Presidentja e Parlamentit Evropian, Roberta Metsola, e cila po qëndron në një vizitë zyrtare në Kroaci, pas takimit me kryetarin e Kuvendit të këtij vendi, Gordan Jandrakoviç, ka bërë thirrje për shtensionim të situatës në mes të Kosovës dhe Serbisë si e vetmja mënyrë për të shtypur dhunë që po shfaqet në këtë pjesë të vendit.

“Parlamenti Evropian ka bërë thirrje qysh prej se i kemi parë tensionet në mes Kosovës e Serbisë, për shtensionim. Nuk ka fjalë tjetër që mund të përdoret, shtensionimi duhet të ndodhë. Nuk mund të përballojmë të shohim më shumë dhunë, në një kohë kur kontinenti jonë është aq i cenueshëm dhe situata është e paqëndrueshme”, ka thënë Metsola.

Për situatën në Veri të Kosovës, Metsola ishte deklaruar edhe në fjalimin e saj hyrë, ku para eurodeputetëve pritej të fliste presidentja e Kosovës, Vjosa Omsani.

Ajo kishte theksuar se Parlamenti Evropian është i vetëdijshëm për sfidat dhe pasojat që ngjarjet e fundit në Veri të Kosovës mund të kenë në stabilitetin e rajonit të Ballkanit Perëndimor duke shtuar se institucioni në fjalë të cilën ajo e drejton është i vetëdijshëm edhe për nevojën e vazhdueshme të BE-së për të theksuar dobitë e de-eskalimit dhe të tejkalimit të krizave të tilla në këtë pjesë të vendit.

Gjithçka mori të tatëpjetën me 26 maj kur Qeveria e Kosovës – pa koordinim me ndërkombëtarët – vendosi që, të shoqëruar nga policia, të fusë tre kryetarët shqiptarë në objektet komunale në Zveçan, Zubin Potok dhe Leposaviq.

Serbët lokalë protestuan të premten, por situata nuk eskaloi.

Të hënën, kur protestuesve iu bashkuan banda huliganësh nga Veriu, shpërtheu protesta dhe përfundimi ishte rreth 40 ushtarë të KFOR-it të lënduar, meqë ata krijuan kordon mes protestuesve dhe policisë.

Nga kjo ditë, shpërthime më nuk ka pasur, por gjendja s’është shtensionuar akoma.

Përkundër se ishin protestuesit që përdoren dhunën, spektri diplomatik e ka bërë kryesisht fajtore qeverinë e Kosovës për zhvillimet, pikërisht për faktin që morën hapa të pakoordinuar me ta.

Ndryshe kryeministri i Kosovës, Albin Kurti, të martën, në një konferencë për media doli me propozim pesë pikesh për shtensionim në Veri.

Të përmbledhura pesë pikat e Kurtit janë që “Të sundojë ligji në Veri, të bëhet identifikimi dhe ndjekja penale e anëtarëve të bandave kriminale, këto grupe të tërhiqen nga Veriu, të bëhet sigurimi i terrenit bashkë me policinë, KFOR-in dhe EULEX-in dhe në fund të shapllet data e zgjedhjeve”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.