Mete pret pasuesin e tij te Financat, uron Malajn dhe i përcjell detyrën

Ministri në largim i Financave, Ervin Mete, ka pritur në një takim ministrin e ri të Financave, Petrit Malaj, ku përveçse e ka uruar për detyrën, i ka përcjellë zyrtarisht edhe punën e ministrit.

Malaj u betua përpara Presidentit të Republikës mëngjesin e 31 korrikut, së bashku me disa emërime të tjera nga kryeministri Edi Rama, ku përfshiheshin Ervin Hoxha si ministër i Brendshëm, Pirro Vëngu si ministër i Mbrojtjes dhe Taulant Balla si ministër shteti për Marrëdhëniet me Parlamentin.

Në reagimin e tij në media sociale, Mete ka shprehur mirënjohje dhe falënderime për kryeministrin Rama, ndërsa gjithashtu ka falënderuar edhe stafin e Ministrisë së Financave për bashkëpunimin.

“Duke i përcjellë detyrën Ministrit të ri. Mirënjohës dhe falënderues ndaj Kryeministrit që më besoi një detyrë me përgjegjësi kaq të lartë. Falënderime për stafin e Ministrisë së Financave për atë që kemi arritur së bashku gjatë kësaj periudhe. Besoj ka qenë një rrugëtim konsolidues për institucionin dhe financat publike, që uroj të vijojë më tej”.

Kështu e ka mbyllur Mete detyrën e tij në krye të Financave.

Kush është Petrit Malaj?

Petrit Malaj ka mbajtur së fundmi detyrën e drejtorit ekzekutiv të Agjencisë së Burimeve Natyrore (AKBN).

Ai u zgjodh në këtë detyrë në janar të vitit 2024.

Sipas një CV-ja te publikuar, Petrit Malaj është diplomuar në Fakultetin Ekonomik të Universitetit të Tiranës, ka vijuar studimet për Master në “Business Administration” në Universitetin Wisconsin- La Crosse në SHBA , është kualifikuar për “Banking and Finance” në Universitetin Georgetown, SHBA dhe më pas ka ndjekur një program kualifikimi për Drejtimin e Tregut të Kapitaleve, të Ministrisë Federale për Bashkëpunim dhe Zhvillim të Gjermanisë.

Ai ka një përvojë të pasur pune në sistemin bankar në Shqipëri dhe më pas është angazhuar si Drejtor Ekzekutiv në kompaninë “BDO Albania”, pjesë e BDO International, grupi i pestë më i madh në botë në fushën e Konsulencës Financiare, Auditit dhe Taksave.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.