Meta vlerëson me Dekoratën e lartë “Nderi i Kombit” dy Dëshmorët e UÇK-së, Selman dhe Besnik Lajçi

Presidenti i Republikës, Ilir Meta, në përvjetorin e 14-të të Pavarësisë së Kosovës, ka vlerësuar me Dekoratën e lartë “Nderi i Kombit” dy dëshmorët e UÇK-së, të cilët sakrifikuan jetën për lirinë dhe mëvetësinë e Kosovës.

“Me nderim dhe respekt të veçantë për jetën, veprën e paharruar dhe kontributet e çmuara atdhetare, si luftëtar i orëve të para për lirinë e Kosovës. Me mirënjohje ndaj sakrificave për lirinë e vendit dhe shembullit të rrallë e frymëzues për brezat e ardhshëm.”

Kështu thuhet në dekoratat për dy figurat e nderuara, Selman Lajçin dhe Besnik Lajçin.

“Për të mbërritur te kjo ditë e rëndësishme, që ne sot gëzojmë dhe festojmë së bashku, u desh shumë mund, sakrifica, gjak i derdhur lum dhe jetë të dhëna nga bashkëkombësit tanë”, ka thënë presidenti.

Ai ka ravijëzuar se dy figurat e shquara të UÇK-së, morën pjesë dhe drejtuan veprime ushtarake kryesisht në zonën e Rugovës dhe pjesë të tjera të Rrafshit të Dukagjinit.

“Lufta e Ushtrisë Çlirimtare të Kosovës, ishte një luftë e shenjtë, ishte lufta për të mbrojtur nderin e familjes, pragun e shtëpisë, por edhe për të çliruar njëherë e përgjithmonë vendin nga sundimi dhe tirania serbe”, ka vijuar Meta.

Për të, treva e Rugovës është shquar gjatë historisë për burra trima e të besës, të mendjes, të penës edhe të pushkës.

“Sa herë janë vënë në pikëpyetje fatet e kombit dhe trojet tona, rugovasit kanë qenë në ballë të frontit të luftës, të sakrificave dhe të derdhjes së gjakut”, ka theksuar presidenti.

Dhe se në luftën më të fundit, rugovasit u shquan në organizimin, sakrificën, vetëmohimin, por edhe në përballjen me forcat e kundërshtarit të pamëshirshëm.

“Rroftë Kosova e lirë dhe e pavarur!”. Kështu e ka përmbyllur Meta fjalën e tij.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.