Meta mbron Berishën nga procesi në SPAK: Akuzat janë politike, po kërkohet asgjësimi i opozitës

Presidenti i Partisë së Lirisë, Ilir Meta, mendon se akuzat që rëndojnë mbi ish-kryeministrin, Sali Berisha, mbi korrupsionin pasiv, janë thjesht politike dhe përmes tyre po kërkohet të asgjësohet opozita në Shqipëri.

Kështu ka thënë ai gjatë një konference për shtyp nga selia e PL-së, ku ka folur për një sërë çështjesh, mes të cilave edhe ajo e Berishës në Prokurorinë e Posaçme SPAK.

“Vendimi i djeshëm i organizatës kriminale SPAK nën drejtimin e Altin Dumanit për të marrë të pandehur pa prova, fakte dhe pa dokumente liderin historik të PD, Sali Berishën, nuk është gjë tjetër veçse një akuzë politike e diktuar nga Edi Rama në funksion të agjendës së tij elektorale me qëllim asgjësimin me çdo mjet të opozitës dhe të pluralizmit politik”, tha Meta.

Ai po ashtu artikuloi se “shërbimi i verbër që SPAK-u po i bën Narkoshtetit, duke goditur drejtuesit e opozitës dhe mbrojtur hapur korrupsionin skizofrenik dhe lidhjet e tmerrshme kriminale të Edi Ramës, është një poshtërim flagrant i sistemit të drejtësisë dhe integritetit të tij”.

Kjo, për Metën, hyn te tradhtitë kombëtare ndaj Shqipërisë dhe ka një nevojë ulëritëse për t’i dhënë fund pandëshkueshmërisë në nivelet më të larta.

“Është ky SPAK që as nuk guxon t’i përmendë emrin Edi Ramës, jo vetëm për çështjen e Sali Berishës por edhe për shumë çështje të tjera ku firmat e tij janë hedhur mbi afera kriminale”, vijoi Meta më tej.

Teksa përmbylli me akuza të forta ndaj SPAK, duke përmendur se ky vendim pa asnjë bazë ligjore ndaj Berishës, është tregues se “SPAK është kthyer në ‘vrasës me pagesë’”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.