Meta ‘lë në baltë’ Kryemadhin: I ka kryer ajo transaksionet financiare, unë kam firmosur me mirëbesim

Presidenti i Partisë së Lirisë, Ilir Meta, duket se e ka lënë në baltë bashkëshorten e tij dhe ish-drejtuesen e forcës së qendrës, ku pas një dalje nga Prokuroria e Posaçme SPAK, ka deklaruar se ka qenë ajo, e cila ka kryer transaksionet në çdo çështje të familjes.

Këtu, duke u ndalur si te pronat, apo edhe thjesht çështje financiare.

Teksa, ai vetë, thjesht “ka firmosur me mirëbesim”, siç pretendon.

“Më pyesin në SPAK a ke diskutuar me Monikën në shtëpi, se ne kështu flasim të gjithë, lidhur me lëvizjet e llogarive bankare apo pronat? Ia thashë që nuk jam marrë asnjëherë me çështjes pronash dhe llogarish, i kam firmosur çdo vit në mirëbesim edhe deklaratat e pasurisë, por nuk e di se çfarë ka bërë Monika, aty e kishin dje le ta pyesin”.

Kështu deklaroi ai gjatë një konference për shtyp.

Gjithashtu, shpjegoi se është pyetur nga SPAK nëse mban mend për veprimet e kryera nga Monika Kryemadhi  për tërheqjen e parave nga llogaritë e bankave.

Por, theksoi se ai vetë nuk ka dijeni, pasi ata kanë pasur pronat e tyre, pallatin e tyre, ka bërë pagesat për fëmijët, por unë nuk jam marrë fare me këtë proces, pasi është marrë Monika Kryemadhi.

Meta shtoi se ai është marrë dhe merret me politikë dhe është i gatshëm të ballafaqohet me këdo jo vetëm në Shqipëri, por edhe përtej oqeanit, pasi “nuk ka bërë asgjë në kundërshtim me ligjin”.

Më herët, ai ka vijuar me një retorikë të ashpër kundrejt drejtuesit të Prokurorisë së Posaçme SPAK, Altin Dumani dhe vetë institucionit të lartë hetimor në vend, duke e përshkruar atë si të kapur nga qeverisja socialiste.

Meta e konsideroi SPAK si aleatin më të verbër të Edi Ramës, duke shtuar se Prokuroria Speciale nuk ka asnjë sukses. Madje Meta tha se SPAK përdoret nga Edi Rama ndaj atyre që Presidenti i PL-së i konsideroi si “limon të shtrydhur”.

Nga ana tjetër, e etiketoi Altin Dumani si “një provokator në shërbim të Edi Ramës’.

“Kishte hallin e inceneratorit ai, nuk ka hallin që qytetarët e Tiranës po vidhen çdo ditë. Pse nuk heton Portin e Durrësit ky Dumani? Më pyet sot mua a e njeh ti Alberto Rançinin? I them çfarë është ky? Jo po ky të ka bërë dhuratë lule për ditëlindje”, tha Meta.

Meta hedh sërish akuza të forta ndaj Altin Dumanit dhe SPAK

Më pas, ai vijoi të shpjegonte versionin e tij të rrethanave: Mbasi u firmos me 140 vota reforma në drejtësi, ata vazhduan lojën duke zgjedhur Arta Markun me 69 vota si Prokurore e Përgjithshme, më pas ajo zgjodhi KLP siç ia kishte qejfi dhe më pas ata zgjodhën SPAK, që sot kontrollohet nga Edi Rama dhe Engjëll Agaçi, personazh kryesor edhe i reportazhit të RAI3.

“Jam thirrur si denoncues i atij betimit te Lana, i asaj kandidates për gjykatëse në Gjykatën Kushtetuese. Kemi një Gjykatë Kushtetuese që sot ka dhënë 99% e vendimeve në favor të Qeverisë”, përmendi më tej ironikisht.

Më pas, vijoi me ironinë karshi SPAK: Jam thirrur si denoncues i planeve për ndarjen e Kosovës, duke mos i dekretuar Edi Ramës kandidatin e propozuar si ministër të Jashtëm. Jam thirrur si denoncues i aferës së detit, që ka si protagonist kryesor Edi Ramën. I jam drejtuar deputetëve me një letër që të marrin përgjegjësitë që iu takojnë për një çështjes madhore. Jam thirrur sepse kam denoncuar SPAK që nuk ka hetuar asnjë nga ato çështjet e krimeve zgjedhore. Është përgjegjësi e SPAK që të hetonte edhe atë vrasjen e ndodhur në Elbasan. Kam çuar në SPAK të gjithë ligjet me porosi që ka bërë Edi Rama dhe SPAK nuk ka bërë asnjë hetim ndaj tyre. Jam thirrur në SPAK pasi kam denoncuar falsifikimin e firmës së Kryetarit të Kuvendit, në atë rastin për hetimin e Presidentit.

Ai theksoi se pikërisht për këto arsye është thirrur në SPAK, pa përmendur gjithsesi çështjen konkrete dhe duke e lënë në rrafshin e ironisë gjithë retorikën e tij.

Në mbyllje ndërkaq, e emërtoi Qeverinë si një “narko-shtet” dhe asaj i bashkëngjiti edhe një “narko-drejtësi”.

Ai tha se SPAK ka gjymtuar hetimet për çdo denoncim që ka bërë opozita, duke nisur nga inceneratorët te dalja e të dhënave të qytetarëve, ku në vend që të hetonte ata që nxorën të dhënat, u mor me gazetarët.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.