Mes institucioneve të Kosovës dhe Martin Berishajt, Kurti zgjodhi Berishajn – pse?

Martin Berishaj është shkelës i ligjit në Kosovë, por ai po vazhdon të gëzojë statusin e plotë të diplomatit si ambasador i vendit në Kroaci. Kryeministri Albin Kurti nuk mërzitet fare nga kjo. Për kryeministrin Kurti kjo nuk paraqet problem dhe po vazhdon ta mbrojë.

Berishaj e ka pranuar vetë para Komisionit Parlamentar për Energji se ai nuk e ka bërë deklarimin e pasurisë ashtu siç e kërkon ligji. Për këtë arsye edhe Agjencioni kundër Korrupsionit i ka ngritur kallëzim penal dhe gjithashtu po hetohet nga Prokuroria Themelore.

Kryeministri Kurti, në një intervistë për Televizionin Dukagjini të enjten është pyetur për Raportin e Departamentit amerikan të Shtetit, ku flitet për “korrupsion serioz” në institucionet qeverisëse dhe për skandalin financiar në Slloveni ku dyshohet të jetë i përfshirë amabasadori Berishaj.

“Është thënë që korrupsion ka në shumë zyrtarë, tash thotë disa zyrtarë”, tha Kurti, duke komentuar Raportin e DASH-it, ndërsa për rastin e Berishaj theksoi se është “fushatë e orkestruar” kundër tij dhe ambasadorit Berishaj.

“Ai (Berishaj) po e pret procesin të kryhet. Në këtë fushatë të egër që është zhvilluar për Martin Berishaj, në Kosovë, Serbi e në Slloveni, gjithashtu edhe për kryeministrin aktual(slloven), i cili e ka quajtur shpifje e shpikje. Është fushatë e madhe ku është edhe Serbia brenda”, tha ai.

Por, kjo nuk është e vërtetë. Kyreministri i Sllovenisë, Robert Golob, nuk e ka quajtur asnjëherë shpifje e as shpikje atë që është raportuar për ambasadorin Brishaj. Ai pati thënë se “është shpifje dhe shpikje” informacioni se ai personalisht ka lidhje me diplomatin kosovar.

“Në gjysmë të rrugës morëm vesh se ky zoti Berishaj, i cili meqë ra fjala është ambasador në Zagreb, është mik personal i Janez Janshës, dhe në momentin që çështja u zhduk nga Sllovenia tani u ringjall, me sa duket në Kosovë”, pati deklaruar Golob.

Ndryshe, një deklaratë të ngjashme e kishte plasuar edhe shefja e diplomacisë, Donika Gërvalla, e cila pati thënë se për ambasadorin Berishaj, deri më tani ka parë vetëm lajme, të cilat i ka quajtur spekulime, prandaj nuk mund të marrte një veprim pa pasur diçka zyrtare.

Skandali financiar i ambasadorit Berishaj ka tronditur opinionin politik në disa shtete, por më së rëndi në Kosovë dhe Slloveni. Edhe më tronditëse është mbrojtja që i kanë bërë akterët kryesorë të pushtetit në Kosovë, ndërsa Berishaj vazhdon të udhëheqë diplomacinë kosovare në Kroaci.

Televizioni shtetëror i Sllovenisë në shkurt të këtij viti transmetoi një emision ekskluziv lidhur me skandalin e madh financiar ku është përfshirë ambasadori kosovar.  Emisioni më i shikuar investigativ (Target) kishte realizuar një edicion special rreth skandalit financiar të kompanisë GEN-I ku fokus ishte pikërisht Berishaj.

“Çështja më e nxehtë me të cilën po merret policia për momentin janë pazaret ballkanike në çështjen GEN-I, për të cilën po zhvillohet procedimi para-hetimor. Ka shumë pyetje të hapura, pa përgjigje në këtë çështje”, thuhej në hyrjen të emisionit.

Gjithashtu, një grup gazetarësh slloven, ndër ta edhe një nga gazetaret më të njohura në Slloveni, Erika Znidarshiç, vizituan selinë e kompanisë GEN-I në Prishtinë, por aty gjetën vetëm një zyre të fotokopjes.

“Është interesante se në Prishtinë ne po kërkonim selinë e degës së GEN-I në adresën zyrtare, por as kuti postare nuk gjetëm. Më të diskutueshmet janë transferimet e degëve serbe të GEN-I tek kompanitë e ambasadorit aktual të Kosovës”.

“Bëhet fjalë për shuma të mëdha, të cilat Berishaj i ka shpërlarë menjëherë pas marrjes së tyre. Nuk dihet se ku i ka marrë paratë. Ne shqyrtuam të dhënat dhe kërkuam përgjigjet e të gjitha institucioneve në Ballkan”, thuhej ndër të tjera.

Madje, shefi i ri i Bordit të kompanisë së energjisë elektrike GEN-I, Maks Helbl, e pati pranuar në emisionin (Target) të televizionit slloven se dega në Beograd e kësaj kompanie e ka paguar ambasadorin Berishaj si konsulent.

“Berishaj na ka dhënë këshilla të rëndësishme. Ky është një person që ka një nivel të caktuar të besimit në publik, ka njohuri edhe për situatën politike në rajon, bazuar në njohuritë e tij ai është në gjendje të sigurojë informacione të nevojshme për tregjet e Kosovës, Malit të Zi dhe Shqipërisë”, shtonte ndër të tjera Helbl.

Rasti kurioz i Maratin Berishaj 

Në Slloveni ekziston një kompani me emrin GEN-I. Kompania është një ndër më të mëdhatë në rajon për tregtim të energjisë elektrike. Mediat në Slloveni kanë zbuluar se përmes kësaj kompania janë shpërlarë para të taksapaguesve slloven.

GEN-I qendror në Slloveni, hapë filiale në Beograd, Sarajevë, Tiranë e vende të tjera. Më vonë, kompania amë përmes akrobacioneve të ndryshme fiskale u lëshon para degëve të saja për arsye të ndryshme financimi.

Ato para, dalin jashtë shtetit slloven dhe bëhen lehtësisht të manipulueshme. Filialet e kompanisë i shpërlajnë ato duke paguar njerëz si Martin Berishaj. Ai paguhet formalisht për konsulencë, si për shembull nga GEN-I në Beograd me shuma të fryra.

Nga aty, të njëjtat dërgohen në bursa e tregjet e ndryshme, kryesisht në Itali. Informacionet e fundit janë se Martin Berishaj me një pjesë të atyre parave ka financuar edhe fushatat elektorale të Lëvizjes Vetëvendosje dhe Listës Guxo.

Berishaj aktualisht po akuzohet nga Prokuroria Themelore e Kosovës për deklarim të rrejshëm të pasurisë dhe nga Prokuroria Speciale për shpëlarje parash derisa vazhdon të mbetet ambasador.

Media sllovene Prava publikoi të dhëna për transaksione të dyshimta dhe aty zbulohet se bëhet fjalë për afër 100 milionë euro të dërguara nga GEN-I në Slloveni si kompani qendrore në degë dhe filale të ndryshme si në Bosnje dhe Hercegovinë, Serbi e Shqipëri.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.