Merdarja e Bërnjaku mbeten të bllokuara, në Jarinje qarkullimi po zhvillohet pa problem

Pikëkalimet ndërmjet Kosovës dhe Serbisë më saktësisht ata në Merdar e Bërnjak vazhdojnë të jenë të mbyllura nga pjesa e Serbisë edhe të shtunën, njofton Qendra Kombëtare për Menaxhimin Kufitar.

Ndërkohë që qarkullimi i veturave në pikëkalimin kufitar në mes të Kosovës dhe Serbisë më saktësisht në Jarinje në mëngjesin e së shtunës po zhvillohet në mënyrë normale përfshirë ato me targa të Kosovës, ka bërë të ditur zëvendësdrejtori i Policisë për rajonin e veriut, Veton Elshani.

Kujtojmë që pikëkalimi në Jarinje, të premten, ishte i mbyllur vetëm për ata që posedojnë dokumente të Kosovës

Bllokimi i kufijve nga ana e Serbisë si shenjë revolte ndaj politikave të Qeverisë së Kosovës në raport me Veriun e vendit nisi si aksion të premten e 6 shtatorit.

Zëvendësdrejtori i policisë për rajonin e veriut, Veton Elshani, ka njoftuar të shtunën se situata në pikëkalimet kufitare “është e qetë” dhe se “nuk ka pasur ndonjë incident”.

Ministrja e Punëve të Jashtme e Kosovës, Donika Gërvalla, i ka bërë thirrje Bashkimit Evropian dhe Shteteve të Bashkuara të Amerikës që të marrin masa ndaj presidentit të Serbisë, Aleksandar Vuçiç.

“Ai duhet të ndalet para se të hyjë në luftë”, vlerësoi Gërvalla.

Në anën tjetër ministri i Punëve të Brendshme, Xhelal Sveçla, njoftoi se në bllokada po marrin pjesë grup ekstremistësh të maskuar “të cilët në prani të policisë së Serbisë, brenda territorit të Serbisë, kanë ndaluar veturat dhe legjitimuar udhëtarët”.

“Para pak çastesh, një familjes e cila po udhëtonte për në Gjermani, i është pamundësuar vazhdimi i udhëtimit dhe është kthyer prapa me forcë”, pohoi ai.

Para nisjes së bllokadave, institucionet e Kosovës u kanë bërë thirrje qytetarëve që ta evitojnë kalimin nga Serbia.

Ministria e Punëve të Jashtme kërkoi nga qytetarët të shmangin kalimin transit nëpër pikëkalimet kufitare me Serbinë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.