Ministrja për Evropën dhe Punët e Jashtme në Shqipëri, Olta Xhaçka, deklaroi se ka shkuar në gjashtë numri i viktimave me origjinë shqiptare nga tragjedia hekurudhore në Greqi.
Lajmi u bë i ditur nga kryediplomatja shqiptare, duke cituar mesazhin e saj ngushëllues për familjarët e viktimave.
“Ngushëllimet më të sinqerta familjarëve të viktimave të aksidentit tragjik hekurudhor në Greqi. Kaq shumë jetë të prera në mes kaq papritur e në mënyrë kaq tragjike! Në këtë ditë zije një lutje e veçantë shkon për familjarët e 6 bashkëkombësve tanë që humbën jetën në këtë aksident: Klaudia Lato, Ifigjenia Micka, Erieta Molko, Ioanis Xhiollas, Denis Ruçi dhe Pavlin Bozo”.
Flamuri i Shqipërisë përpara Kryeministrisë dhe të gjithë simbolet e tjera zyrtare nëpër institucione janë ulur në gjysmë-shtizë.
Të dielën e 5 marsit, Shqipëria po nderon me një ditë zie viktimat e tragjedisë hekurudhore në Greqi.
“Ditën e diel Shqipëria do të nderojë me një ditë zie viktimat e tragjedisë, duke u bashkuar simbolikisht me Greqinë mike me flamurin kombëtar të ulur në gjysmë shtize”, shkruante Rama ditë më parë në Facebook.
Sipas tij, tragjedia e Greqisë “është edhe tragjedia jonë, dhimbja për jetët e humbura në aksidentin e tmerrshëm është edhe jona”.
“Ky është një nga ato momente jetësore”, vëren kreu i Qeverisë, “kur një humbje e madhe tek fqinji të tregon më shumë se sa njëqind gëzime që jetët tona janë të ndërlidhura pazgjidhshmërisht, e se duhet të bëjmë çmos që t’i bëjmë ato sa më të mira, duke bashkëpunuar gjithnjë e më shumë me njëri-tjetrin”.
Sipas të dhënave të fundit, numri i personave të vrarë si pasojë e përplasjes së trenave të pasagjerëve dhe mallrave pranë qytetit grek të Larisës është të paktën 57.
Këtë e ka thënë në transmetimin e radiostacionit grek RealFM, shefja e mjekësisë ligjore, Rubini Leontari.
Sipas saj, të mërkurën morgu i qytetit mori shtatë trupa të djegur, 14 të tjerë u dorëzuan të enjten.
Përveç kësaj, aty janë mbledhur më shumë se 10 çanta me pjesë të veçanta të trupit, të cilat do të identifikohen nga analiza e ADN-së.
Siç raportojnë mediat greke, që nga e enjtja, gjashtë viktima të aksidentit hekurudhor mbeten në gjendje kritike, dhe më shumë se 70 janë në trajtim spitalor si në qytetin e Larisas ashtu edhe më gjerë.
Kujtojmë se aksidenti në përmasa të mëdha ka ndodhur të martën para mesnate.
Një tren pasagjerësh që transportonte rreth 350 persona u përplas me një tren mallrash teksa doli nga tuneli pasi u largua nga qyteti i Larisas.
Shefi i stacionit lokal u akuzua për vrasje të pavullnetshme.
Ministri i transportit i Greqisë dha dorëheqjen pas katastrofës, ashtu si edhe krerët e dy kompanive hekurudhore.
Kryeministri grek Kyriakos Mitsotakis tha se aksidenti ishte shkaktuar nga “gabim tragjik njerëzor”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.comLajmet kryesore
-
Armatimi – Strategjia e Shqipërisë në mbrojtje
-
Mësuesit protestë para Ministrisë së Arsimit për 1 maj: Të dyfishohen pagat
-
SHBA-të janë ‘të vendosura të marrin një armëpushim që do t’i sjellë pengjet në shtëpi’
-
Bakoyannis: Asnjë kandidati nuk i është kërkuar përmbushja e kaq shumë kushteve sikurse Kosovës