Menendez dhe Roth letër Borrellit e Blinkenit: Ata që mbrojnë shtetin ligjor dhe demokracinë nuk duhet të qortohen
![](https://albanianpost.com/wp-content/uploads/2023/08/borrell-blinken.jpg)
Politikanë dhe ekspertë të politikës së jashtme nga disa shtete perëndimore i janë drejtuar me një letër të përbashkët Përfaqësuesit të Lartë të Bashkimit Evropian, Josep Borrell, Sekretarit amerikan të Shtetit, Antony Blinken dhe ministrit të Punëve të Jashtme të Britanisë së Madhe, James Cleverly, lidhur me situatën politike dhe të sigurisë në pjesën veriore të Kosovës.
Ata kanë kërkuar nga kryediplomatët evropiano-amerikanë një qasje më të ashpër dhe më të vendosur ndaj presidentit të Serbisë, Aleksandër Vuçiç, shkruan gazeta gjermane “Tagesspiegel”, ndërsa kanë tërhequr vërejtjen se në adresimin e krizës në veriun e Kosovës të banuar me serbë etnikë, politika perëndimore duhet të udhëhiqet nga “diplomacia parandaluese” dhe “gabimet e së kaluarës”.
Politikat aktuale të Bashkimit Evropian, Shteteve të Bashkuara të Amerikës dhe Britanisë së Madhe, veçanërisht në lidhje me Serbinë dhe Kosovën, thuhet tutje në letër, nxjerrin në pah “pika të dobëta në qasjen tonë të përbashkët”, ndërsa ndër të tjera theksohet edhe domosdoshmëria për kthimin e “ekuilibrit dhe proporcionalitetit” në marrëdhëniet e botës perëndimore me Kosovën dhe Serbinë.
“Mungesa e presionit ndaj Serbisë pas arrestimit arbitrar të tre policëve kosovarë dhe dështimi për të mbajtur përgjegjës për sulmet ndaj forcave të KFOR-it, tregojnë mungesën aktuale të paanshmërisë në trajtimin e pikave të tilla problematike”, thuhet në letrën që është përkrahur nga kryetarët e komisioneve parlamentare për politikë të jashtme të Britanisë së Madhe, Çekisë, Ukrainës, Irlandës, Estonisë dhe Lituanisë.
Në letrën e nënshkruar mbi të gjitha nga kryetari i komisionit parlamentar për politikë të jashtme në Parlamentin e Gjermanisë (Bundestag) Michael Roth dhe kryetari i Senatit të Shteteve të Bashkuara të Amerikës, Bob Menendez, specifikohet se baza e politikës së përbashkët përndimore ndaj krizës aktuale në veri, duhe të jetë fakti se Kosova është një vend sovran dhe një demokraci funksionale.
“Qasja aktuale nuk po funksionon. Ne kërkojmë që komuniteti ndërkombëtar të mësojë nga e kaluara jonë dhe të sigurojë që ne të mos ndjekim politika me qendër Beogradin. Të shqyrtohet një politikë e diplomacisë parandaluese për të parandaluar një përkeqësim të mëtejshëm të situatës së sigurisë në veri të Kosovës. Ata që mbrojnë shtetin ligjor dhe demokracinë nuk duhet të qortohen”.
“Zbulimet e fundit të depove të armëve në veri të Kosovës dhe raportet për kontrabandën e vazhdueshme të armëve përmes kufirit Serbi – Kosovë, nxjerrin në pah rreziqet e përshkallëzimit të mëtejshëm. Kosova është një vend sovran dhe një demokraci funksionale. Ky fakt duhet të përbëjë bazën e politikës sonë të përbashkët ndaj krizë aktuale”, thuhet ndër të tjera në letër.
Gjithashtu, në letër shprehet shqetësimi se diplomatët evropiano-amerikanë po ndjekin një politikë të butë në drejtim të Serbisë, nga frika se ajo mund të rreshtohet në anën e Rusisë, në një kohë kur regjimi serb refuzon vendosjen e sanksioneve kundër Moskës për agresion e paprovokuar ndaj Ukrainës dhe faktit se presidenti rus, Vladimir Putin, gëzon simpati të madhe në mesin e popullatës serbe.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com