Mendimet e një djaloshi ukrainas për nënën e ndjerë

Anatoly, një djalosh 9-vjeçar, i cili duhet të ishte duke luajtur rrugicave të lagjes në qytetin Hostomel, disa kilometra larg në veri të Kievit, tani mendon sesi të hedhë të zezën mbi të bardhë, mendimet e fundit, për “engjëllin” e tij lart në “parajsë”.

“Kjo letër është një dhuratë për ty”, i drejtohet Anatoly të ëmës, e cila humbi jetën para syve të tij, teksa po përpiqeshin të arratiseshin nga Hostomel, ku trupat ruse hapën zjarr edhe mbi makinën e tyre.

Atë e quanin Galyna, shkruan fëmija ukrainas, dhe gjithçka dëshiron ai është t’i shprehë mirënjohjen për fëmijërinë e kaluar deri më tani.

Anatoly, i cili njihet edhe me nofkën “Tolya”, shkruan në fletoren që, rastësisht i ra ndër duar teksa e shpëtuan, se “nëse mendoni se jam rritur kot, e keni gabim”.

“Këto 9 vite kanë qenë më të mirat e jetës sime. Të jam shumë mirënjohës për fëmijërinë time! Ti je nëna më e mirë në botë dhe nuk do të të harroj kurrë!”

Ai i bën një premtim Galyna-s, teksa shpreson që nëna e tij të jetë e lumtur në parajsë.

“Do të përpiqem të jem një djalë i mirë për të ardhur tek ti në parajsë”.

Letra përfundon me “puthje” dhe emrin e Galyna-s.

Marrë nga “Corriere della Sera”, përshtatur për Albanian Post!

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.