Lajme

“Menaxhmenti i KEK-ut i ka rreth 107 milionë euro fitim në 2022, ndërsa s’ka ngritje të pagave për punëtorët që nga viti 2018” – protesta që mund të dërgojë në grevë


Foto: Albanian Post.

E premtja e 28 prillit do t’i gjejë punëtorët e Korporatës Energjetike të Kosovës (KEK), sërish në protestë.

Kërkesë kryesore e kanë atë për ngritje pagash.

Që nga viti 2018 asnjë punëtorë i KEK-ut nuk ka pasur ngritje të pagës, pavarësisht që performanca e KEK-ut ka qenë mjaft e mirë dhe nga menaxhmenti është deklaruar se kanë pasur mbi 100 milionë euro fitim.

Kryetari i Sindikatës së re në KEK, Nexhat Llumnica thotë se në njërën anë “menaxhmenti deklaron se i ka diku 107 milionë euro profit në vitin 2022, kurse në anën tjetër “nuk ka ngritje të pagave që nga viti 2018”.

Një mal kërkesash – “greva dikujt do i pëlqej për pazare personale”

Llumnica, në një prononcim për Albanian Post, thotë se kanë “një mal kërkesash”.

“Kërkojmë ngritje të pagave, kërkojmë shujte të ushqimit, kërkojmë vlerësim të riskut të rrezikut dhe kërkojmë marrëveshje kolektive në nivel të ndërmarrjes, e vetmja ndërmarrje në Kosovë që nuk ka marrëveshja kolektive është Korporata Energjetike e Kosovës”, thotë Llumnica për AP.

Mirëpo, thekson njërën që për ta është kryesore.

“Kërkesa jonë është që të ketë 30 për qind rritje apo 250 euro, paga mesatare është 627 euro duke u bazuar nga paga më e lartë përveç menaxhmentit, por që në krahasim me natyrën e KEK-ut dhe punën që bëhet është shumë pak”.

“Ne nuk po kërkojmë diçka të pamundur, po kërkojmë atë që është e mundur dhe po kërkojmë atë qe e meritojmë”.

Sipas tij, “performanca në KEK është historike, financat janë të mjaftueshme, prodhimi dhe angazhimi është maksimal dhe për këtë arsyeje ne kemi vendosur të kërkojmë ngritje të pagave”.

Teksa, zemërimi i punonjësve thotë se është rritur kur rritja e pagave është bërë pothuajse për të gjithë punëtorët e Kosovës, e jo edhe per ta.

“Mllefi i punëtorëve ka ndodhur në momentin kur në të gjithë Kosovën ka pasur ngritje të pagave, mirëpo jo edhe në KEK, jo edhe në kompaninë më të fuqishme në Kosovë. Neve na quajtën hero, na quajtën aset kryesor, mirëpo ky emërtim nuk ka vlerë nëse nuk ka para”.

Llumnica, përmend edhe faktin se mbi 1 mijë persona janë pensionuar të cilët asnjëherë nuk janë zëvendësuar.

Ndërsa KEK-u ka edhe mungesë të punëtorëve me mbi 2 mijë.

“Përkundër kësaj nuk ka nevojë as të ngritët buxheti i rrogave as për marrëveshje kolektive, për arsyeje se vetëm për marrëveshje kolektive pra pesë vitet e fundit kanë shkuar në pension dikund rreth 1 mijë e 500 persona përfshirë edhe rastet e vdekjes, ne në bazë të skemës organizative i kemi 2 mijë punëtorë mungesë”.

“Mezi po ia dalë muajit”

Haxhi Kastrati, i punësuar në këtë korporatë që nga viti 1984, në një bisedë për Albanian Post shprehet se puna që e kryejnë nuk përputhet aspak me pagat që marrin.

Me këto paga siç janë aktualisht Kastrati është duke pasur vështirësi që edhe ta përfundojë të gjithë muajin.

“Bazuar në punën dhe kushtet që na ofrohen në vendin ku ne punojmë nuk janë të mjaftueshme, madje ka raste kur as një muaj nuk mund ta kalojmë me këto paga”, thotë Kastrati për AP.

Një kërkesë të ngjashme ai pohon se e kishin pasur edhe në muajt e kaluar, por që për të njëjtën asnjëherë nuk kishin pranuar përgjigje pozitive.

“Protesta të ngjashme kemi pasur edhe në të kaluarën, me të njëjtën kërkesë. S’kemi kërkuar diçka që nuk na takon, por kemi kërkuar që rritja të bëhet vetëm në bazë të rritjes së inflacionit dhe rritjes së çmimeve në produktet bazë që është bërë muajt e fundit”.

“Rritja që po kërkojmë është rreth 30 për qind, që do të thotë 250 euro deri në 300 euro. Kjo kërkesë është e prerë dhe nuk tërhiqemi nga kjo”.

Për 38 vjet në këtë korporatë, Kastrati thotë se deri në realizimin e kësaj kërkese nuk do të ndalen pasi që disa “kërkesa tjera që i kemi e dimë që nuk do të plotësohen, prandaj po e kërkojmë këtë si kryesoren”.

Nga diskutimet që ka pasur javëve të fundit me kolegët e tij të kësaj korporate bën të ditur se akoma nuk dihet se sa pjesëmarrës do të jenë në këtë protestë por sipas tij, “dikund rreth 2 mijë punëtorë do të jenë”.

Kosova gjatë këtij viti është përballur edhe me çmime shumë të larta të energjisë.

Së fundmi çmimi është rritur për 14 për qind.

KEDS-I e ka justifikuar kërkesën për rritje të tarifave të energjisë elektrike me rritjen e çmimit të rrymës së importuar, si dhe me pamundësinë e Korporatës Energjetike të Kosovës (KEK) për të prodhuar rrymë të nevojshme, sidomos gjatë sezonit të dimrit.

Kosova ka kapacitet të prodhojë rreth 800 megavate rrymë në orë, ndërsa nevojat e saj, në ditë dimri, arrijnë deri në 1 mijë e 300 megavate në orë.

Këtë diferencë, ajo e importon nga jashtë.

Nga muaji shtator i vitit 2022, Qeveria e Kosovës, i ka subvencionuar të gjithë qytetarët që shpenzojnë më pak energji elektrike.

Kurse nga ekzekutivi ishte bërë thirrje që nga viti 2022 ndaj qytetarëve që ta kursejnë rrymën, për shkak të krizës globale energjetike, të cilën e ka thelluar lufta e Rusisë në Ukrainë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore