Mediat serbe: Dialogu në nivel të kryenegociatorëve mbahet të martën

Disa media në Serbi, si agjencia e lajmeve serbe, Tanjug e Radio Televizioni i Serbisë, RTS, po raportojnë se të martën e 17 shtatorit në kryeqendrën evropiane, Bruksel, prite të mbahet takimi i radhës në nivel të kryenegociatorëve.

Siç pretendojnë po këto media, Serbia ka pranuar që të ketë edhe takim trepalësh, pra në mes të kryenegociatorit të Kosovës, Besnik Bislimit e kryenegociatorit të palës serbe, Petar Petkoviç, nën ndërmjetësimin e të deleguarit të Bashkimit Evropian për dialogun, Miroslav Lajçak.

Por, ka qenë Kosova ajo, gjithmonë sipas pretendimeve të këtyre mediave, që ka refuzuar një takim kokë më kokë me Petkoviç-in.

Mediat serbe, duke u thirrur në burime diplomatike, potencojnë se gjatë takimit pritet të diskutohet edhe për urën kryesore mbi lumin Ibër.

Albanian Post gjatë ditës ka dërguar pyetje në drejtim të Bashkimit Evropian për të konfirmuar raportimet e mediave serbe.

Deri në publikimin e këtij lajmi nuk ka arritur të pranojë përgjigje.

Diplomati sllovak javën e kaluar vizitojë Kosovën e Serbinë me qëllim “përgatitjen e një takimi të nivelit të kryenegociatorëve”.

Pas takimit me Bislimin, Lajçak njoftoi se gjatë takimit u diskutua edhe hapja e urës kryesore mbi lumin Ibër për qarkullimin e automjeteve.

“Qëndrimi i Bashkimit Evropian është i mirënjohur, por duhet ta përsëris: Ura duhet të hapet, por hapja duhet të bëhet në bashkëpunim të ngushtë me partnerët ndërkombëtarë”, shtoi ai.

Ndërkohë pas takimit me presidentin e Serbisë, Aleksandar Vuçiç, Lajçak njoftoi se presidenti serb “ka ngritur shqetësime të forta për situatën e komunitetit serb në Kosovë”.

“Theksova se duhet të diskutojmë dhe të gjejmë zgjidhje të dakorduara në Dialog”, ka shkruar Lajçak.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.