Mediat në Maqedoni: Incident me Vjosa Osmanin në aeroportin e Shkupit, refuzoi ta hap valixhen – u nxorën edhe armët

Mediat në Maqedoni të Veriut kanë raportuar se ka ndodhur “një mega skandal në aeroportin ndërkombëtar të Shkupit”, pasi presidentja e Kosovës, Vjosa Osmani, ka pasur konfrontim me sigurimin e aeroportit dhe më pas ka kërkuar ndihmë nga kryetari i parlamentit të Maqedonisë së Veriut, Afrim Gashi, i cili ka dërguar në aeroport sigurimin e tij.

Siç raportojnë këto media, janë nxjerrur edhe armët në aeroport, por akoma asgjë nuk është zyrtare rreth këtij incidenti të raportuar dhe s’ka konfirmime nga institucionet.

Albanian Post e ka konfirmuar lajmin nga dy burime në Maqedoni të Veriut. Por, lajmi nuk është konfirmuar akoma nga kabineti i presidentes, apo nga kryetari i parlamentit të Maqedonisë së Veriut.

Sipas një media maqedonase Infomax.mk, gjithçka ka filluar kur Osmani, që po e përdorte aeroportin e Shkupit si tranzit ka refuzuar ta hap valixhen për kontroll, kur diçka e tillë i është kërkuar nga sigurimi i aeroportit.

Ajo është ndalur dhe me këtë rast ka telefonuar Gashin.

“E gjithë ngjarja ka ndodhur në seksionin VIP të aeroportit ku ka mbërritur presidentja e Republikës së Kosovës, Vjosa Osmani. Gjegjësisht, kur ka mbërritur Osmani, e cila ka qenë duke shfrytëzuar Maqedoninë për tranzit, në përputhje me procedurën e sigurisë së aeroportit, asaj iu kërkua të hapë valixhet e saj dhe të tregojë se çfarë kishte në to. Osmani nuk pranoi të zbatonte urdhrin dhe iu drejtua në mënyrë të pahijshme sigurimit të aeroportit”, shkruan media maqedonase.

“Pasi Vjosa Osmani nuk pranoi t’i hapte valixhet, ajo telefonoi kryetarin e Kuvendit të Maqedonisë, Afrim Gashi, nga i cili kërkoi ndihmë për të kaluar pa kontrolluar bagazhet e saj”.

Më pas Gashi ka dërguar pjesëtarët e sigurimit të tij në krye me shefin Sabedin Sinani, të cilët u drejtuan për në aeroportin e Shkupit.

Ata kanë kërkuar që Osmani të kalonte, pas refuzimit nga sigurimi i aeroportit, situata ka eskaluar dhe janë nxjerrur armët.

E njëjta media shkruan se kanë kërkuar përgjigje nga Ministria e Punëve të Brendshme rreth këtij rasti, por akoma nuk ka një raportim nga organet e rendit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.