Kryetarja e Kuvendit të Shqipërisë, Lindita Nikolla, ka mbyllur seancën e parashikuar për raundin e parë të votimeve për zgjedhjen e Presidentit të Republikës së Shqipërisë.
Kjo erdhi pasi Grupet Parlamentare dhe deputetët nuk kishin paraqitur asnjë kandidaturë.
Nikolla bëri me dije se të martën do të mblidhet Konferenca e Kryetarëve për të paraqitur datën për raundin e dytë të votimit.
Kjo e fundit, sipas Nikollas, duhet të paraqitet brenda shtatë ditëve – siç parashikohet në Kushtetutë – pas raundit të parë të votimeve.
Kryetarja e Komisionit të Ligjeve, Klotilda Bushka, njoftoi se nuk është paraqitur asnjë kandidaturë.
Afati i fundit i dorëzimit të emrave ishte 15 maji, deri në orën 16:00.
Partia Socialiste njoftoi të premten se nuk do të dërgonte asnjë propozim në raundin e parë – duke plotësuar një nga kërkesat e opozitës shqiptare.
Ndërkohë, afatet u vendosën me propozim të socialistëve, pasi përfaqësuesit e opozitës nuk morën pjesë në votim.
Kushtetuta e Shqipërisë parashikon 24 majin si afatin e fundit për nisjen e procedurave për zgjedhjen e Presidentit të Republikës.
Kriteret e opozitës
Kryetari i Grupit Parlament të Partisë Demokratike, Enkelejd Alibeaj, në një deklaratë për mediat ka bërë me dije se kanë propozuar kritere për zgjedhjen e presidentit të ri.
“Përcolla qëndrimin e Partisë Demokratike te grupet e tjera. Kemi rënë dakord që jo vetëm të marrim pjesë, por të jemi për një proces real, të sinqertë. Presidenti duhet të jetë neutral, t’u qëndrojë sfidave”.
Ai theksoi se procesi i zbatuar në procedurë është garancia e parë.
“Ky proces do duhet që të mos perceptohet si lojë. Mazhoranca nuk mund ta zgjedhë e vetme. E drejta për të propozuar së paku i takon opozitës”.
Ndërsa kryetari i Grupit Parlamentar të PS-së, Taulant Balla, ka deklaruar se janë bërë hapa para për sa u përket emrave konkretë për presidentin e ri.
Sipas kushtetutës aktuale, socialistët mund ta zgjedhin vetë presidentin në raundin e tretë.
Shumica e kërkuar është e thjeshtë, 71 vota pro dhe ata i kanë me formatimin e parlamentit.
Rruga drejt një presidenti me konsensus të gjerë kalon edhe nga miratimi i opozitës.
Për t’u zgjedhur që në raundin e parë duheshin 84 vota.
Presidenca e shtatë në Shqipëri do të përmbyllet më 24 korrik të vitit 2022. Në krye të shtetit që prej 2017-ës është Ilir Meta.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com-
Rrëzohet kërkesa e Redi Mollës për heqjen e sekuestros për celularin e bashkëshortes
-
Vdekja e 3-vjeçarit nga anestezia – Grupi i mjekëve italianë do të kryejë ekspertizën
-
SPAK kërkon dënimin e Alqi Bllakos për Inceneratorin e Elbasanit
-
Favorizoi djalin e Tom Doshit pas aksidentit, pezullohet shefi i qarkullimit rrugor në Lezhë