Mbyllet pa incidente protesta e opozitës përballë Kuvendit

Pas më shumë se 1 orë e gjysmë është përmbyllur zyrtarisht protesta e opozitës përballë Kuvendit të Shqipërisë.

Duke përjashtuar përplasjet e fillimit të protestës mes mbështetësve të opozitës dhe policisë, kjo protestë ishte e qetë dhe pa incidente duke iu përafruar asaj të së shtunës.

Mbështetës të paktë u konfrontuan që në pikënisje me forcat e policisë duke hedhur mjete piroteknike në drejtim të parlamentit.

Protestuesit tentuan të thyejnë kordonin e sigurisë për të hyrë në oborrin e Kuvendit duke hasur në rezistencën e forcave policore.

Gjatë përplasjeve mbeti gjithashtu i plagosur lehtë një efektiv i FNSH-së.

Kryetari i Partisë Demokratike, Sali Berisha gjendet në punimet e seancës plenare të 13 shkurtit dhe protesta e opozitës udhëhiqet nga përfaqësues të tjerë të selisë blu si Luçiano Boçi apo Albana Vokshi të cilët janë përjashtuar me 10 ditë nga kryekuvendarja Lindita Nikolla.

Marshimi i lirisë dhe revolucioni ishin dy konceptet shteruese të protestës së 11 shkurtit.

Mandej të dyja përvijuan aplikimin në protestën e të hënës përpara Kuvendit të Shqipërisë, siç u njoftua.

Por, aksioni opozitar duket se ka hyrë në një qark vicioz duke llogaritur ecejaken e kryedemokratit në kryeqytet pa frikën e një përsëritjeje të incidentit të izoluar të 6 dhjetorit.

Në thelb, vijimi i revolucionit dhe marshimi i lirisë të cilin Berisha e ndau në disa etapa institucionale, është i fragmentuar.

Kjo, mes deputetëve të cilët gjenden brenda seancës plenare dhe “të përjashtuarve”.

Njësoj si të thuash se grupimi Alibeaj gjendet krah protestës por renditet mes “të përjashtuarve” nga kauza dhe foltorja e lëvizshme.

Mijëra mbështetës të opozitës u mblodhën para Kryeministrisë duke akuzuar Qeverinë shqiptare për korrupsion.

Ndër të tjera ata protestuan kundër kostos së lartë të jetesës që po i detyron njerëzit të largohen nga vendi.

Protestuesit, të udhëhequr nga lideri i opozitës Sali Berisha, hodhën mjete piroteknike në hyrje të zyrave të qeverisë ku qindra oficerë policie me mjete kundër trazirave bllokuan protestuesit të hynin në ndërtesë.

Sërish, protesta nuk u përshkallëzua duke ruajtur një format paqësor të shprehjes së pakënaqësive ndaj Ekzekutivit.

“Edi Rama jepe dorëheqjen, shko ku e keni vendin, në shtyllën e turpit, në shtëpinë e tradhtarëve”, tha Sali Berisha, kreu i Partisë Demokratike në opozitë, duke shtuar se të hënën do të thirrej një protestë e re para parlamentit.

Berisha, një ish-president dhe ish-kryeministër, e ka të ndaluar të hyjë në Shtetet e Bashkuara për korrupsion të dyshuar, akuza të cilat ai i mohon.

Gjatë protestës së 11 shkurtit kryedemokrati akuzoi kryeministrin Rama se ka korruptuar zyrtarët amerikanë për të lobuar kundër tij dhe kundër partive opozitare.

Akuza të tilla hidhen poshtë si nga Rama ashtu edhe nga Qeveria amerikane.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.