Mbretëria e Bashkuar: Rishi Sunak i premton Lula-s 92 milionë euro për Amazonën

Kryeministri britanik Rishi Sunak i premtoi presidentit brazilian Lula të premten se do t’i paguajë 80 milionë paund (rreth 92 milionë euro) një fondi ndërkombëtar për mbrojtjen e pyjeve tropikale të Amazonës.

“Përveç futbollit, ne kemi shumë interesa të përbashkëta, qoftë forcimi i lidhjeve tona tregtare, apo luftimi i ndryshimeve klimatike”, tha Rishi Sunak në fillim të takimit të tij me Luiz Inacio Lula da Silva, i cili udhëtoi për në Londër për kurorëzimin e Mbretit Charles III të shtunën.

Fondi Amazon, i krijuar në vitin 2008, gjatë qëndrimit të parë të Lulës në presidencë, aktualisht arrin në rreth 3 miliardë realë (rreth 550 milionë euro) dhe ka si donatorin kryesor Norvegjinë (90 për qind të fondeve).

Në fund të janarit, gjatë një vizite zyrtare në Brasilia, kancelari gjerman Olaf Scholz siguroi se vendi i tij ishte gati të paguante 200 milionë euro për ruajtjen e pyllit tropikal, duke përfshirë një kontribut prej 35 milionë në Fondin Amazon.

“Kjo është arsyeja pse unë jam i lumtur të njoftoj se do të investojmë në Fondin tuaj të Amazon dhe ju përgëzoj për udhëheqjen tuaj në këtë fushë”, shtoi kryeministri britanik, i cili priti Presidentin brazilian në rezidencën e tij zyrtare në Downing Street.

Një zëdhënës i zyrës së kryeministrit tha se kontributi do të arrijë në ” 80 milionë paund, për të ndihmuar në çrrënjosjen e shpyllëzimit dhe ruajtjen e biodiversitetit në këtë zonë”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.