Zap Map, gjurmues i infrastrukturës së karikimit të makinave elektrike, ka deklaruar përmes një njoftimi në platformën e komunikimit, Twitter, se Mbretëria e Bashkuar ka instaluar katër mijë karikues të shpejtë për makinat elektrike.
“Tanimë ka katër mijë pika të shpejta karikimi në më shumë se 2 mijë e 600 vendndodhje në të gjithë Mbretërinë e Bashkuar”, ka shkruar Zap Map në llogarinë e tij në Twitter.
Sipas TNW, faqe kushtuar të rejave teknologjike, instalimet e reja të Mbretërisë së Bashkuar për karikuesit e shpejtë të makinave elektrike, mbeten ende larg ritmeve të Holandës e cila disponon rrjetin e karikimit me rritjen më të shpejtë në botë.
Mbretëria e Bashkuar ka shtuar rreth një mijë karikues të shpejtë gjatë vitit të kaluar, ndërsa Holanda e cila është sa 1/3-ta e popullsisë së Mbretërisë së Bashkuar, ka instaluar rreth 1 mijë e 850 karikues të shpejtë në fillim të këtij viti.
Karikuesit e shpejtë kanë potencialin të karikojnë një makinë elektrike mesatare nga zero në 80% karikim në më pak se një orë.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
