Mbi 3 mijë profesionistë shëndetësorë u larguan nga Kosova për tri vjet, Haxhiu: Sistemi shëndetësor do të kolapsojë

Deputeti i Partisë Demokratike të Kosovës (PDK), Bekim Haxhiu, ka paralajmëruar se largimi i stafit shëndetësore nga Kosova dhe punësimi i madh i tyre në sektorin privat shumë shpejtë do ta dërgojë sistemin shëndetësor në kolaps.

Haxhiu, në fjalimin e tij në seancën e Kuvendit të Kosovës të enjten ka thënë se në gjashtë mujorin e parë janë larguar mbi 3 mijë mjekë të sektorëve të ndryshme.

“Deri më 1 qershor 2024, për tri vjet e gjysmë mbi 3 mijë e 860 profesionistë shëndetësorë kanë ikur nga Kosova dhe shumë të tjera nga sektori publik në atë privat”.

“Kjo është shumë alarmante. Ikja e profesionistëve shëndetësore nga Kosova, është shndërruar në dukuri shqetësuese për sistemin tonë shëndetësorë sepse ne nuk mund të prodhojmë profesionistë shëndetësor, aq sa po na ikin nga Kosova”.

Ai ka thënë se me situatën aktuale parashihet edhe mbyllja e disa shërbimeve në spitalet e komunave.

“Kjo shumë shpejt do ta dërgojë në kolaps sistemin tonë shëndetësor. Kjo është pasojë e keqqeverisjes ku edhe me statutin e ShSKUK-së, parashihet mbyllja e disa shërbimeve në spitalet regjionale”.

Në vitin 2022, ministria e Shëndetësisë, kishte provuar një formë politike që t’i mbajë mjekët në Kosovë.

Kërkesa e tyre kishte qenë që mjekët e diasporës të kthehen dhe të kontribuojnë në Kosovë për përmirësimin e këtij sektori.

“Ju inkurajoj që të ktheheni dhe të gjeni veten në Kosovë. Mërgimtarë e kemi edhe ministrin Dr. Latifi, ai është kthyer nga Shtetet e Bashkuara të Amerikës”, ishte thirrja e kryeministrin Albin Kurti në kohën kur Latifi ishte ende ministër.

Ai u largua, e të tjerët as që erdhën, kurse kërkesës së Qeverisë i ishin përgjigjur pozitivisht vetëm dy mjekë të diasporës.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.