Mbi 16 mijë vaksina Pfizer mbërrijnë në aeroportin e Rinasit

Mbrëmjen e 5 korrikut, kanë mbërritur në aeroportin “Nënë Tereza”, mbi 16 mijë vaksina anticovid të kompanisë Pfizer.

Lajmin e ka bërë të ditur kryeministri, Edi Rama, me anë të një postimi në median sociale Facebook.

“16 mijë e 380 doza të vaksinës Pfizer sapo kanë mbërritur në Shqipëri, nga kontrata e qeverisë shqiptare me kompaninë Pfizer si dhe pjesë e mbështetjes së Bashkimit Evropian, të siguruara nga qeveria austriake”, ka shkruar Rama.

Vaksinat u pritën në aeroportin e Rinasit nga ministrja e Shëndetësisë, Ogerta Manastirliu,  ambasadori i BE-së në Tiranë, Luigi Soreca dhe ambasadori austriak, Christian Steiner.

Në fjalën e saj, Manastirliu u shpreh se po shkojmë drejt 1 milion vaksinimeve, ndërsa kanë mbërritur mbi 1 milion e 120 mijë vaksina.

Nga ana tjetër, Soreca theksoi se BE-ja deri më tani ka sjellë 60 mijë vaksina Pfizer, ndërsa brenda muajit gusht do të plotësohet kontrata prej rreth 150 mijë vaksinave.

Fushata e vaksinimit

Fushata e vaksinimit masiv vijon gjithashtu me ritme të shpejta. Ndërkohë deri më tani janë vaksinuar 900 mijë shqiptarë.

Mbi 300 mijë qytetarë, i kanë kryer të dyja dozat e vaksinës anti-Covid.

Në Shqipëri kanë mbërritur deri tani mbi 1 milion doza të vaksinave anti-Covid, ndërsa janë siguruar përmes kontratave të deritanishme, 2.4 milionë doza.

Që prej fillimit të vaksinimit masiv të popullsisë, Shqipëria renditet ndër vendet me fushatat më të suksesshme të dozave të administruara për banor.

Katër janë vaksinat e përdorura në vendin tonë: Pfizer, AstraZeneca, Sputnik V dhe Sinovac.

Ministria gjithashtu ju bën apel të gjithë qytetarëve të mos e ulin vigjilencën. Apel ka edhe për vijimin e zbatimit të rregullave për parandalimin e Covid-19

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.