Mbi 100 të helmuar nga ushqimi i një lokali në Malishevë – krejt çka dihet deri më tani

Deri më tani nga ushqimi i një lokali në Malishevë janë helmuar mbi 100 persona, teksa pronari i lokalit është arrestuar nga Policia e Kosovës dhe janë asgjësuar 64 kilogram mish që janë gjetur në lokal.

Numrin e të helmuarve e ka bërë të ditur Zëdhënësi i Agjencisë së Ushqimit dhe Veterinës, Lamir Thaçi, në një konferencë për media të shtunën, derisa ka dhënë detaje të tjera për këtë rast.

Thaçi ka njoftuar se nga inspektimet që janë bërë në lokalin në fjalë, është vërejtur që gjendja e përgjithshme teknike, sanitare e higjenike nuk ka qenë në nivelin më të mirë, por edhe se janë gjetur produkte pa origjinë.

“E dyta nuk kanë pas libreza sanitare punonjësit që kanë punuar në këtë lokal, që sipas ligjit kërkohet të ketë. Aty janë gjetur disa produkte që në i quajmë pa origjinë apo nuk kanë pasur dokumentacion mbështetës për tu ditur origjina e tyre”, tha Thaçi.

Ai ka bërë të ditur se, pas kontrollit të institucioneve kompetente, janë asgjësuar 64 kilogram mish, kryesisht i viçit.

“Pas përfundimit të mostrimit produktet të cilat nuk kanë poseduar dokumentacion janë asgjësuar sasia totale 64 kg kryesisht mish produkte mishi. Lokali nga mbrëmë është mbyllur përkohësisht deri në një vendim tjetër të organeve kompetente”.

Zëdhënësi i AUV-it ka shtuar se deri më tani nga informata që i kanë nga mekanizmat shëndetësor “janë rreth 100 persona që kanë kërkuar shërbime mjekësore qoftë në Qendrën Klinike Familjare në Malishevë, në spitalin regjional në Prizren dhe në QKUK”.

Ai ka theksuar se ky është rasti i dytë që është duke ndodhur brenda një jave, dhe se ky institucion do të fillojë një aksion në të gjithë territorin e Kosovës, pra të gjitha lokalet e gastronomisë do të inspektohen.

“Tani që është rasti i dytë që po ndodh brenda një javë është alarmuar ministri dhe drejtori ekzekutiv, të cilët kanë dhënë urdhër që ne të fillojmë një aksion të gjithmbarshëm në gjithë territorin e republikës së Kosovës, ku të gjitha lokalet e gastronomisë, këto që gatuajnë dhe shërbejnë ushqime të shpejta ti nënshtrohen kontrollit të detajuar”, pohoi.

Pjesa më e madhe e helmimeve, deklaroi Thaçi, “ka ndodhur tek kjo kategori e lokaleve”, duke shtuar se “dëshirojmë që kjo të mos ndodhë më”.

Për rastin ka reaguar edhe Ministri i Shëndetësisë, Arben Vitia, teksa ka dhënë informacione për gjendjen e pacientëve të helmuar.

Përmes një postimi në Facebook, Vitia ka thënë se në Qendrën Klinike Universitare të Kosovës (QKUK) të hospitalizuar janë 11 qytetarë dhe 9 qytetarë të tjerë janë në Spitalin e përgjithshëm të Prizrenit.

“Gjendja e të gjithë të hospitalizuarve pas marrjes së trajtimit mjekësor është e qetë dhe stabile”, shkroi.

Ndërsa, ka shtuar se inspektoratet dhe organet ligjzbatuese “janë në terren dhe kanë marrë të gjitha të dhënat lidhur me rastin dhe burimin e shkakun e helmimit”.

Një ditë pas helmimit të qytetarëve të Malishevës, Policia e Kosovës, të shtunën ka njoftuar se e ka arrestuar pronarin e lokalit.

“Lidhur me rastin është arrestuar pronari i lokalit i dyshuari mashkull kosovar dhe me vendim të prokurorit kujdestar, i dyshuari është dërguar në mbajtje” njoftoi policia.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.