“Mbështetja e SHBA-së është e palëkundur dhe miqësia jonë është e përjetshme”, thotë Osmani pas takimit me Harrisin

Presidentja e Kosovës, Vjosa Osmani, gjatë qëndrimit të saj në Zvicër ku po merr pjesë në Samitin e Paqes së Ukrainës, është takuar me zëvendëspresidenten e Shteteve të Bashkuara të Amerikës, Kamela Harris.

Osmani, ka thënë se ia ka përcjell mirënjohjen që ka populli i Kosovës ndaj SHBA-së.

“I përcolla mirënjohjen e thellë të popullit të Kosovës për mbështetjen e palëkundur dhe miqësinë tonë të përjetshme!”, ka shkruar ajo.

Osmani, e cila po përfaqëson vendin në Samitin e Paqes për Ukrainën, gjatë ditës, përmes një video-adresimi në Facebook, ka thënë se në këtë iniciativë do të tregojë tregimin se si Kosova është ndërtuar nga zeroja.

“Si një shtet që ka vuajtur shumë, si një shtet që ka sakrifikuar shumë, megjithatë jemi shndërruar në një model të demokracisë”, ka thënë ajo.

Osmani, ndërsa ka potencuar se ky samit ka një rëndësi të jashtëzakonshëm, ka vlerësuar se në këtë iniciativë nuk mjafton që thjesht paqja “të shihet si një koncept i izoluar”.

“Paqja në masë të madhe varet edhe nga drejtësia, drejtësia për viktimat, për ata që kanë vuajtur më së shumti gjatë luftës. Si Kosovë ne i bashkohemi thirrjeve të të gjithë atyre të cilët shtyjnë përpara konceptin e paqes së drejtë, pra paqes së ndërlidhur me drejtësinë për viktimat që kanë vuajtur gjatë luftës”, ka shtuar ajo.

Ndërkaq, gjatë qëndrimit në Zvicër në kuadër të margjinave të Samitit të Paqes për Ukrainën, ajo ka takuar edhe presidenten e Zvicrës, Viola Amherd, presidenten nga Malta, Myriam Spiteri Debono, presidentin e Ukrainës, Volodymir Zelenskyy dhe atë të Malit të Zi, Jakov Milatoviç.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.