Mazhoranca kërkon rezolutë që dënon sulmin e 24 shtatorit në veri të Kosovës

Të dy kahët politikë në Kuvendin e Shqipërisë duket se po shkojnë drejt një unanimiteti për një rezolutë që dënon sulmin e 24 shtatorit në veri të Kosovës.

Pas propozimit nga ana e Partisë Demokratike, ka ardhur edhe kërkesa e mazhorancës për një rezolutë të ngjashme, e cila pritet të diskutohet në Konferencën e Kryetarëve të mërkurën e 4 tetorit.

Deputetja e Partisë Socialiste, Mimi Kodheli kërkoi që edhe Partia Socialiste të depozitojë një draft-rezolutë për çështjen e Kosovës.

“Do të doja të dilnim nga ky parlament sot me një rezolutë për Kosovën”, u shpreh përfaqësuesja socialiste. “Kemi gati një draft-rezolutë, ka edhe një nga PD-ja, t’i diskutojmë e të vijmë në Kuvend me një rezolutë”.

Ministri për Evropën dhe Punët e Jashtme, Igi Hasani u bëri sërish thirrje bashkësisë ndërkombëtare që të ndërhyjnë për normalizimin e situatës mes Kosovës dhe Serbisë.

“Qeveria ka dënuar aktin kriminal në Kosovë. Ka tentativa të rrezikshme për të destabilizuar Kosovën. Nxitësit duhet të ndëshkohen. Dita e zisë në Beograd është sinjali më i keq që i jep rajonit. BE-ja dhe SHBA-të duhet të ngrenë lart alarmin për përshkallëzimin e situatës dhe garantimin territorial të Kosovës. Duhet të ketë shtim të KFOR-it si garanci për sigurinë në Kosovë”, pohoi kryediplomati shqiptar.

Nga ana tjetër kreu i grupit parlamentar të demokratëve, Gazment Bardhi shtoi se ministri në radhë të parë duhet të dënonte sulmin e Serbisë.

“Duhet një rezolutë një orë e më parë të koordinuar me parlamentin e Kosovës. Duhet të dimë çfarë po bën diplomacia shqiptare në nxirjen e një hetimi ndërkombëtar. I bëjmë thirrje bashkësisë ndërkombëtare. T’i ulin në një proces autentik për normalizimin, kjo është sot një domosdoshmëri. Kemi deklaruar se formati i dialogut duhet ngritur nga Shqipëria”, theksoi deputeti demokrat.

Sakaq, edhe deputetja demokrate Jorida Tabaku pyeti ministrin e Jashtëm nëse është koordinuar me qeverinë e Kosovës për rolin e KFOR-it në Kosovë.

“Situatë dramatike për Kosovën. Duhet zoti Ministër t’i drejtoheni BE-së për heqjen e masave të Kosovës e vendosjen e sanksioneve ndaj Serbisë. A jeni koordinuar me qeverinë e Kosovës për rolin e KFOR-it në Kosovë?”, shtoi ajo.

Kujtojmë që, Kuvendi i Republikës së Shqipërisë nisi seancën plenare 4-orëshe të hënën e 2 tetorit me një minutë heshtje për nder të rreshterit të ndjerë të Policisë së Kosovës, Afrim Bunjaku i cili u vra nga grupet terroriste të dielën e 24 shtatorit në Banjskë të Zveçanit.

Partia Demokratike kërkoi më herët që të thërrasë në interpelancë kryeministrin shqiptar, Edi Rama, lidhur me deklaratat e tija të mëparshme mbi veriun e Kosovës, pas sulmit terrorist serb.

Kryeministri Rama ka kërkuar në këtë rast edhe ndërhyrjen e paqeruajtësve të KFOR-it, për t’u vendosur në mbajtjen e rendit në komunat veriore me shumicë serbe.

Një deklaratë kjo, e cila nuk është pritur mirë as nga faktori politik në Kosovë e as nga opozita shqiptare dhe pikërisht kjo e fundit, mbi disa parime e kërkon interpelancën.

Në bazë të një shkrese dërguar në Kuvendin e Shqipërisë nga deputeti demokrat Kreshnik Çollaku, shpjegohet se reagimet nga Qeveria shqiptare kanë qenë kontradiktore.

“Ndërsa nga një anë dënohej akti, nga ana tjetër hezitohej të thirrej në përgjegjësi për këtë akt Beogradi dhe Presidenti Vuçiç. Postimet në rrjetet sociale të Kryeministrit, në të cilat cilësohej ngjarja e ndodhur si një “tragjedi” krijuar konfuzion në lidhje me qëndrimin e parë të Kreut të Qeverisë në lidhje me ngjarjen. Sikur kjo të mos mjaftonte në konferencën për shtyp Kryeministri Rama, i fundit nga radha i drejtuesve politik të shumë vendeve fqinje dhe partnere, me se fundmi deklaroi përgjegjësinë e Serbisë mbi ngjarjen”.

Dialogu nuk funksionon më – Rama kërkon që KFOR të marrë kontrollin e Veriut, Macron dhe Scholz të përfshihen direkt për normalizimin

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.