Masat e BE-së ndaj Kosovës, Golob: Duhet pasur një qasje të balancuar, asnjëherë s’ka vetëm një fajtor

Kryeministri i Sllovenisë, Robert Golob, para takimit të Këshillit të Bashkimit Evropian, duke folur për situatën e krijuar në Veri të Kosovës, ka thënë se duhet të ketë zgjedhje të reja në katër komunat Veriore, dhe se duhet që të ketë pjesëmarrje edhe të serbëve lokalë.

“Ne besojmë se zgjedhjet duhet të përsëriten sa më shpejt të jetë e mundur. Ne besojmë se serbët duhet të marrin pjesë në votim, me mbështetjen e Beogradit nëse është e nevojshme, në mënyrë që ata të mund të zgjedhin përfaqësuesit e tyre legjitim”, ka thënë Golob, transmeton rrjeti ballkanik i lajmeve “N1”.

Pas kësaj, kryeministri slloven vlerësoi se duhet që Kosova ta themelojë Asociacionin e Komunave me Shumicë Serbe.

“Mendoj se është një proces kompleks. Nëse të dyja palët shkojnë në të me qëllime të sinqerta, atëherë ky qëllim është i arritshëm”.

Sa i përket masave të mundshme të mëtejshme të Bashkimit Evropian kundër Kosovës për shkak të refuzimit të saj ndaj kërkesave të BE-së për shtensionimin e situatës në Veri, ai potencoi se “duhet pasur një qasje të balancuar”.

“Asnjëherë nuk ka vetëm një fajtor, edhe pse në një moment të caktuar mund të duket kështu”.

Ndërsa, Kryeministri i Kroacisë, Andrej Plenkoviç, para takimit të Këshillit të Bashkimit Evropian, duke folur për situatën e krijuar në Veri të Kosovës ka thënë se shteti që ai përfaqëson dëshiron de-eskalim të situatës, duke shtuar se duhet që të ketë zgjedhje të reja në katër komunat Veriore.

“Qëndrimi ynë është se duam deeskalim pas të gjitha incidenteve të muajve të fundit, e që nuk ishin pak. Porosia e dytë, duam sa më shpejt të mbahen zgjedhje të reja në komunat me shumicë serbe në veri të Kosovës. Zgjedhjet duhet të jenë të sigurta. Në zgjedhjet e fundit pati bojkot”, ka thënë ai.

Ndërkaq, ai theksoi se gjatë qëndrimit të tij në Podgoricë ka biseduar me përfaqësuesit e Kosovës, “e dëgjova edhe kryeministrin e Kosovës, Albin Kurti, po ashtu në Vojvodinë bisedova me kryeministren e Serbisë, Ana Brnabiç”.

“Kam marrë pikëpamjet e të dy liderëve. Ekziston gatishmëria për organizimin e zgjedhjeve, por duhet të jenë gjithëpërfshirëse. Nëse bojkotohen, atëherë do të gjendemi sërish në situatë të njëjtë. Kroacia do paqe, deeskalim e zgjedhje të reja”, ka shtuar Plenkoviç.

Nga ana tjetër, Përfaqësuesi Special i Bashkimit Evropian për Politikë të Jashtme, Josep Borrell, në një prononcim të shkurtër para gazetarëve në vigjilje të takimit të shteteve anëtare të Bashkimit Evropian, ku ndër të tjera do të diskutohet edhe për situatën në Veri të Kosovës ka potencuar se do të kërkojë përkrahje nga shtetet anëtare të Unionit për të vazhduar presionin ndaj Kosovës e Serbisë që të shtensionohet situata në Veri të Kosovës.

Sipas diplomatit spanjoll nëse nuk do të merren hapa për shtensionim të situatës atëherë Kosova dhe Serbia do të përballen me pasoja.

“Do të njoftojë liderët për gjithë punën e këtyre ditëve. E do të kërkojë përkrahjen për të vazhduar të bëjë presion te palët, që të evitohet eskalimi e të kthehet në normalitet. Shtetet anëtare kanë vendosur në takimin e fundit të Këshillit, që masat duhet të merren, ekonomike e politike, t’u bëhet e qartë se nëse nuk kontribuojnë për shtensionim atëherë do të ketë kosto”, ka thënë Borrell, shkurtimisht.

Borrell thotë se do të kërkojë përkrahjen e BE-së për të ushtruar presion mbi Kosovën dhe Serbinë

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.