Prokuroria Speciale e Kosovës, brenda javësh do të ngrit aktakuzë për Masakrën e Dubravës, e kryer nga forcat serbe mbi të burgosurit shqiptarë gjatë 19 dhe 24 majit të vitit 1999.
Kështu të paktën ka bërë të ditur prokurori, Ilir Morina, në një intervistë për Radio Televizionin e Kosovës ku edhe ka treguar se hetimet ndaj të dyshuarve kanë përfunduar.
“Kemi arrestuar një të dyshuar për masakrën e Dubravës, hetimet janë zhvilluar për një kohë të gjatë. Ne, veç kemi përfunduar hetimet në këtë rast dhe jemi në fazën e vlerësimit të provave për mundësinë që brenda javësh, për të mos thënë muajsh, të ngremë një aktakuzë.”, ka thënë prokurori Morina.
Rasti tjetër për të cilën do të ngritët aktakuzë, sipas tij, është ai i Staradranës, ku janë vrarë 16 civilë.
“Edhe në atë rast kanë përfunduar hetimet, jemi në përpunimin e dosjes me mundësinë që brenda javësh ta ngrisim aktakuzën”, shtoi ai.
Sipas tij, problemet politike, si bashkëpunimi me Serbinë, janë faktori kryesor që pengojnë hetimin e këtyre rasteve.
“Fatkeqësisht ne kemi vetëm mundësinë e parë – mbledhjen e provave në territorin e Kosovës. Me Serbinë mungon bashkëpunimi që fatkeqësisht është pengesë e madhe në punën tonë. Të gjithë të pandehurit janë të arratisur dhe presupozojmë e për disa edhe e dimë se jetojnë në Republikën e Serbisë”, ka nënvizuar Morina.
Morina ka theksuar ndër të tjera se me rritjen e numrit të hetuesve është mundësuar mbledhja e fakteve dhe se po bëhet më shumë punë për zbardhjen dhe dënimin e kryerësve të krimeve të luftës.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
