Kryeministri i Kosovës, Albin Kurti në Forumin Ekonomik Botëror, është takuar me kryeministrin e Bullgarisë Nikolai Denkov, me të cilin ka diskutuar për procesin e liberalizimit të vizave dhe për përkrahjen e Bullgarisë për anëtarësimin e Kosovës, në Këshillin e Evropës.
Përmes një komunikate për media, është thënë se Kurti dhe Denkov kanë diskutuar edhe për marrëdhëniet bilaterale.
“Së bashku folën për marrëdhëniet bilaterale, për 13 marrëveshjet e nënshkruara deri më tani ndërmjet dy vendeve dhe 7 të tjera që janë në proces të finalizimit, për bashkëpunim ndërshtetëror dhe rajonal si dhe situatën e sigurisë në rajon”.
“Kryeministri Kurti e falënderoi homologun e tij bullgar për mbështetjen që Bullgaria i ka dhënë Kosovës në procesin e liberalizimit të vizave, për përkrahjen aktive në procesin e anëtarësimit në Këshillin e Evropës dhe për kontributin në fushën e sigurisë e mbrojtjes përmes pjesëmarrjes së saj në misionin e KFOR-it”, thuhet në komunikatë.
Kurti, është takuar të mërkurën edhe me kryeministrin e Kroacisë, Andrej Plenkoviç në margjinat e Forumit Ekonomik Botëror në Davos.
Takimin e ka bërë të ditur Plenkoviç, përmes një shkrimi në rrjetin social ‘X’, ku ka thënë se me kreun e ekzekutivit kosovar kanë diskutuar për situatën në rajon, duke ofruar edhe mbështetje për anëtarësimin e Kosovë në Bashkimin Evropian dhe Këshillin e Evropës.
“Me kryeministrin e Kosovës, Albin Kurti diskutova për situatën në rajon. E përgëzova për heqjen e regjimit të vizave si dhe i shpreha mbështetjen tonë për anëtarësimin në Këshillin e Evropës dhe në rrugën drejt BE-së”, ka shkruar Plekonviç.
Gjatë qëndrimit të tij në Zvicër, Kurti është takuar edhe me anëtarin e Këshillit Federal dhe kreun e departamentit të Drejtësisë, Beat Jans, me të cilin ka diskutuar për luftën kundër korrupsionit dhe krimit në Kosovë.
Më 15 janar, kryeministri Albin Kurti, ka udhëtuar në Zvicër, ku është duke marrë pjesë edhe në Forumin Ekonomik Botëror (WEF) në Davos.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
