Kryeministri i Kosovës, Albin Kurti, të martën, ka takuar ministrin e Brendshëm të Izraelit, Moshe Arbel, të cilin e ka falënderuar për nënshkrimin e marrëveshjes për heqjen e regjimit të vizave për shtetasit e Kosovës.
“Ai e vlerësoi këtë marrëveshje si zhvillim pozitiv në marrëdhëniet Kosovë-Izrael, por edhe lajm i mirë për qytetarët tanë, i cili vjen 6 muaj pasi u arrit dhe liberalizimi i vizave me zonën Shengen”.
Në takim, siç thuhet në komunikatën për media e lëshuar nga Zyra e Kryeministrit, është nënvizuar rëndësia e “fuqizimit edhe më tej të bashkëpunimit ekonomik, rritjes dhe promovimit të shkëmbimeve tregtare”.
“Kryeministri ftoi kompanitë dhe investitorët izraelit që të hulumtojnë e njohin prej së afërmi ambientin e përshtatshëm të të bërit biznes që ofron Kosova”, thuhet në komunikatë.
Izraeli i ka hequr vizat për qytetarët e Kosovës, duke u bërë kështu shteti i 50-të që mundëson lëvizje të lirë për kosovarët. Nënshkrimi i marrëveshjes në mes të dy shteteve u bë më 18 qershor në Prishtinë, nga ministrja e Punëve të Jashtme, Donika Gërvalla, dhe ministri i Brendshëm i Izraelit, Moshe Arbel.
Izraeli është shteti i fundit që e njohu Kosovën.
Dy shtetet zyrtarizuan marrëdhëniet diplomatike në shkurt të vitit 2021.
Atyre iu parapriu ajo që njihet si Marrëveshja e Uashingtonit, të cilën Kosova dhe Serbia e nënshkruan më 4 shtator të vitit 2020, me qëllim normalizimin e marrëdhënieve ekonomike.
Kosova hapi ambasadën e saj në Jerusalem në korrik të vitit 2021, në këmbim të njohjes së pavarësisë së saj nga Izraeli.