Marrëveshja e Asociacionit të Komunave me Shumicë Serbe, duhet të rishikohet dhe të dy palët duhet të pajtohen për një version të modifikuar të saj.
Kjo për shkak të vendimit të Gjykatës Kushtetuese ku thuhet se marrëveshja në fjalë “nuk është tërësisht në përputhje me frymën e Kushtetutës” .
Kështu ka thënë për Albanian Post, njohësi amerikan i çështjeve të Ballkanit Perëndimor, Alon Ben-Meir.
“Edhe pse është e nevojshme të zbatohet çdo marrëveshje e arritur midis dy palëve, duke pasur parasysh vendimin e gjykatës në lidhje me kushtetutshmërinë e saj, marrëveshja duhet të rishikohet dhe të dyja palët mund të bien dakord për një të modifikuar”, është shprehur ai.
Ben Meir në një prononcim me shkrim ka theksuar se një zbatim i asociacionit, i pamodifikuar e dobëson kontrollin e Kosovës në Veri të vendit.
“Marrëveshja siç është sot pakëson gradualisht kontrollin e Kosovës në veri dhe presioni i Bashkimit Evropian mbi Kurtin për ta zbatuar atë nuk është i justifikuar. Meqenëse një marrëveshje e tillë minon pavarësinë e Kosovës, Shtetet e Bashkuara të Amerikës dhe shumica e shteteve të BE-së që njohën pavarësinë e saj nuk duhet të kërkojnë asgjë nga Kosova që komprometon pavarësinë e saj”.
Sipas tij, Serbia po vazhdon të luajë “kokëfortën”, e në veçanti ashtu siç e sheh Presidenti i Serbisë, Aleksandër Vuçiç, që BE-ja dhe SHBA-të “po bëjnë më shumë presion mbi Kosovën se sa mbi vendin e tij”.
“Asgjë nuk pritet të ndodhë nëse Serbia tërhiqet nga marrëveshja, pasi në fund të fundit Serbia është ajo që po bën shpesh kërkesa të paarsyeshme”, ka thënë ai.
Megjithatë, Ben Meir konsideron se Kryeministri Kurti duhet të demonstrojë se është i gatshëm për të hyrë në një dialog të ri sepse përfundimisht çdo përparim i bërë në procesin e normalizimit midis dy vendeve “do t’i sjellë dobi Kosovës”.
“Kurti duhet të bëjë gjithçka në fuqinë e tij për të trajtuar komunat me shumicë serbe në mënyrë të barabartë, si çdo rajon tjetër shqiptar i Kosovës, veçanërisht në fushat e kujdesit shëndetësor, arsimit dhe mundësive të punës”.
Kjo sepse, në vetvete nuk përbën ndonjë alternativë për themelimin e Asociacionit, por “demonstron qartë se ai është i përkushtuar ndaj barazisë midis të gjithë qytetarëve pavarësisht nga përkatësia etnike ose orientimi i tyre fetar”.
“Duke vepruar kështu Kurti mund të neutralizojë, të paktën pjesërisht, kërkesën pa mëdyshje të Serbisë për ‘të drejtën e themelimit të asociacionit të komunave’”.
Çka parasheh Asociacioni i komunave me shumicë serbe?
Themelimi i Asociacionit është paraparë me Marrëveshjen e Brukselit të vitit 2013, të arritur mes Kosovës dhe Serbisë. Pas dy vjetësh, më 2015, të dyja palët (Kosova dhe Serbia), ishin pajtuar edhe për themelimin e tij.
Në këtë asociacion parashikohet të mblidhen rreth dhjetë komuna në Kosovë ku shumica e popullsisë është serbe, siç janë, Mitrovica e Veriut, Kllokoti, Parteshi, Ranillugu, Graçanica, Zveçani, Zubin Potoku, Novobërda, Leposaviqi dhe Shtërpca.
Themelimi i këtij asociacioni ka për qëllim të përfaqësojë interesat kolektive të këtyre komunave, si në fushën e arsimit, shëndetësisë, planifikimit urban e atij rural si dhe të ekonomisë.
Marrëveshja fillestare për Asociacionin thekson se Asociacioni do të krijohet me statut dhe strukturat e tij, mbi bazën e statutit të Asociacionit të komunave të Kosovës.
Marrëveshja e dytë mbi parimet e Asociacionit të komunave me shumicë serbe
Pas marrëveshjes së arritur në vitin 2013, Kosova dhe Serbia në Bruksel në vitin 2015, nën ndërmjetësimin e BE-së, ishin pajtuar edhe për një marrëveshje shtesë për themelimin e Asociacionit.
Sipas kësaj marrëveshjeje, Asociacioni parashihte të kishte nga një kuvend si trup suprem, i cili do të përbëhej nga përfaqësues të emëruar prej anëtarëve të zgjedhur nga kuvendet e komunave pjesëmarrëse.
Po ashtu, Asociacioni ishte paraparë që ta ketë buxhetin e tij, i cili do të administrohej në përputhje me parimet e transparencës e llogaridhënies dhe dispozitave të Ligjit mbi prokurimin publik.
Por, Gjykata Kushtetuese e Kosovës kishte konstatuar se parimet për të nuk janë në përputhje me Kushtetutën e Kosovës, edhe pse ka thënë se ato mund të harmonizohen me një akt ligjor të Qeverisë së Kosovës.
Çka kishte thënë Gjykata Kushtetuese për Asociacionin e Komunave Serbe?
Megjithatë, GJK-ja marrëveshjen e 25 gushtit të vitit 2015 për Asociacionin e kishte shpallur si “jo tërësisht në përputhje me frymën e Kushtetutës, përkatësisht me disa nene që kanë të bëjnë me kapituj mbi barazinë para ligjit, të Drejtat dhe Liritë Themelore dhe kapitullin mbi të drejtat e Komuniteteve dhe Pjesëtarëve të tyre”.
Pas nënshkrimit të këtij vendimi të GJK, ajo i ishte lënë në dorë Qeverisë së Kosovës që të themelojë Asociacionin e komunave me shumicë serbe në bazë të parimeve të marrëveshjes për Asociacionin të 19 prillit të vitit 2013.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
