Spanja, Portugalia dhe Maroku janë të vendosur për të pritur Kupën e Botës 2030, me kombin afrikan të vendosur të mos mbetet prapa në garën për të pritur finalen. Një stadium i ri 115 mijë vendesh dhe problemet në Federatën Spanjolle mund të shohin “Bernabeu”-n ose “Camp Nou”-n të eliminuara si vende finaliste të mundshme.
Maroku nuk ka qenë pas në veprime për të shfrytëzuar mundësinë për të rrëzuar nga froni spanjollët, të cilët janë përfshirë në një skandal, dhe për të rrëmbyer një finale që të gjithë e kishin marrë si të mirëqenë, do të luhej në tokën evropiane në një mega-stadium.
Vlen të theksohet se të mërkurën e kaluar Njësia Qendrore Operative (UCO) e Guardia Civil bastisi selinë e Federatës Mbretërore të Futbollit Spanjoll në kërkim të kontratave të dyshuara të parregullta nga pesë vitet e fundit, periudhë gjatë së cilës Luis Rubiales ishte në krye të futbollit spanjoll.
Ndonëse këto parregullsi nuk kërcënojnë organizimin e Kupës së Botës, ato mund të kenë ndikim në organizimin e ndeshjes më të shumëpritur, finales së Kupës së Botës FIFA.
Maroku po planifikon të ndërtojë një stadium me të vërtet mahnitës. Një kapacitet për 115 mijë spektatorë është pika kryesore e kontratës së dhënë firmës arkitekturore “Cruz y Ortiz”.
Kontrata për të ndërtuar atë që do të jetë “stadiumi më i madh i futbollit në botë” i është dhënë një firme arkitekturore të udhëhequr nga spanjollët, pikërisht kombi që Maroku shpreson ta kalojë në garën për organizmin e finales.
Përveç arkitektëve spanjollë, “ëndrra marokene” për të pritur finalet në tokën vendase do të realizohet edhe nga firma britanike “Populous”, e cila do të projektojë dhe ndërtojë stadiumin në bashkëpunim me firmën franko-marokene “Oulalous+Choi”.
Kanë mbetur pak më shumë se gjashtë vjet deri në Kupën e Botës, e cila do të zhvillohet për herë të parë në tre kontinente, me ndeshjet e para që do të luhen në Argjentinë, Uruguai dhe Paraguaj për të përkujtuar 100 vjetorin e Kupës së parë të Botës FIFA, e cila u mbajt në kryeqytetin e Uruguait, Montevideo.
Maroku do të ketë një stadium që do të vendoset 38 kilometra në veri të Kazablankës, në një zonë prej 100 hektarësh në qytetin El Mansouria, në provincën e Benslimane.
Stadiumi do të jetë një strukturë nën një çati të madhe. Dizajni është frymëzuar nga tubimi shoqëror maroken i njohur si “moussem” dhe ka një buxhet të vlerësuar prej rreth 459 milionë eurosh.
Mega-projekti do të jetë më i madhi në botë, duke tejkaluar stadiumin “Rungrado 1st of May” në Pyongyang, Koreja e Veriut, i cili do të mbetet i dyti më i madhi me një kapacitet prej 114 mijë vendesh.
Përveç kapacitetit të tij të madh, stadiumi do të ketë edhe një pistë atletike, një pishinë të mbyllur, një qendër tregtare dhe një hotel, duke përmbushur të gjitha kërkesat e vendosura nga FIFA për të pritur këtë ngjarje futbolli, e cila u ndoq nga 1.5 miliardë shikues vetëm gjatë finales së fundit.
Stadiumi më i madh i Marokut deri më sot është “Mohamed V” në Casablanca (67,000), i cili do të jetë pak më shumë se gjysma e madhësisë së stadiumit të ri vetëm disa minuta larg.
Ai gjithashtu do të tejkalojë shumë kapacitetin e stadiumit “Lusail” në Katar, i cili më 18 dhjetor 2022 priti 88,966 tifozë për një nga finalet më të mira dhe më emocionale në histori, mes Argjentinës së Lionel Messi-t dhe Francës së Kylian Mbappe-s.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
