MAPL: Hapja e urës së Ibrit gjatë verës, potenciali për trazira është zvogëluar

Zëvendësministri i Administrimit të Pushtetit Lokal, Arbër Vokrri, njoftoi se hapja për qarkullim i urës mbi lumin Ibër, e cila bashkon Mitrovicën e Veriut me atë të Jugut, do të bëhet gjatë verës, meqë potenciali për trazira është zvogëluar.

Ndonëse Bashkimi Evropian tha se vendimi për hapjen e urës mbi lumin Ibër duhet të merret vetëm pas negociatave në Bruksel, Vokrri ka vlerësuar se kushtet për zbatimin e këtij vendimi tashmë janë krijuar.

“Arsyeja e mos hapjes së urës ka qenë e thjeshtë që të mos ngutemi e të mos dukemi që po tentojmë ta provokojmë situatën, mirëpo me kalimin e kohës potenciali për trazira vërehet qartë se është zvogëluar”, ka thënë ai në një intervistë për Tëvë1.

Më 28 prill të vitit të kaluar Kuvendi Komunal i Mitrovicës së Veriut mori vendim që të lejojë qarkullimin në urën mbi lumin Ibër. 1 vit më pas zëvendësdrejtori i Policisë së Kosovës për rajonin e Veriut, Veton Elshani, paralajmëroi se ky vendim do të zbatohet në praktikë shumë shpejt.

Lidhur me paralajmërimin e hapjes për qarkullim të urës mbi lumin Ibër ka reaguar edhe Bashkimi Evropian. Zëdhënësja e Zyrës së BE-së në Kosovë, Ioanna Lachana, i tha Albanian Post se çdo vendim lidhur me urën mbi lumin Ibër duhet të merret pas negociatave në dialogun e ndërmjetësuar nga blloku evropian.

KFOR: Rihapja e urës së Ibrit duhet të zgjidhet përmes dialogut politik

Sipas Vokrrit BE-ja dhe organizatat ndërkombëtare duhet të mësohen se menaxhimi i çështjeve komunale i takon institucioneve të Kosovës.

“Opinioni i përgjithshëm është se duhet të mësohet edhe BE-ja edhe instancat tjera ndërkombëtare të pranishme në Kosovës se qytetarët e Kosovës janë të interesuar për bashkëjetesë”.

Skënder Sadiku, zëvendës-kryesues i Kuvendit Komunal të Mitrovicës Verore i kishte thënë Albanian Post se vendimin për hapjen e urës së Ibrit e kanë marrë pas aneksave të qytetarëve të qytetit të Mitrovicës në të dy anët e Ibrit.

“Po kërkojmë ta hapim qytetin, jo vetëm ndonjë pjesë në jug apo në veri. Brenda qytetit ka pasur disa akse ku ka qenë problematik qarkullimi i veturave. Ne kemi kërkuar që në shenjë të normalizimit të lejohet edhe qarkullimi i automjeteve”, kishte thënë Sadiku për AP.

Në lidhje me rihapjen e urës së Ibrit, kishte reaguar edhe misioni paqeruajtës i NATO-s në Kosovës (KFOR), të cilët kishin potencuar se kjo gjë mund të bëhet vetëm përmes dialogut politik mes Kosovës dhe Serbisë nën udhëheqjen e BE-së.

Lista Serbe – partia më e madhe e serbëve të Kosovës – të enjten reagoi pas paralajmërimit të Zëvendësdrejtorit të Policisë së Kosovës për rajonin e Veriut, Veton Elshani, se shumë shpejt do të hapet ura mbi lumin Ibër që lidh Mitrovicën e Jugut me atë Veriut.

Ashtu edhe siç pritej, përmes një komunikate për media, nga partia që dirigjohet totalisht nga Beogradi zyrtar, thanë se një veprim i tillë është i papranueshëm, dhe, sipas tyre, përshkallëzon situatën.

“Njoftimi i regjimit të Albin Kurtit se planifikon të hapë urën kryesore të qytetit në Mitrovicë për qarkullim të automjeteve është një veprim absolutisht i panevojshëm, i papranueshëm dhe përshkallëzues që synon destabilizimin e mëtejshëm të situatës në terren”, kanë propaganduar nga kjo listë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.