Mandati i Xhaçkës, Bardhi: U ekzekutua përfundimisht Reforma në Drejtësi

Gazment Bardhi – kreu i grupit parlamentar të Partisë Demokratike (PD) – ka reaguar në lidhje me votimin e Kuvendit për mandatin e Olta Xhaçkës.

Sipas tij, me vendimin e marrë është “ekzekutuar përfundimisht” Reforma në Drejtësi.

“Me votë politike të Edi Ramës në Kuvend dje u ekzekutua përfundimisht Reforma në Drejtësi. Puçi kushtetues i Kuvendit duke injoruar autoritetin e Gjykatës Kushtetuese është i pa ndodhur kurrë në 34 vjet, i paprecedent dhe i denjë vetëm për regjimet diktatoriale”, ka thënë Bardhi.

Dje, ka vijuar ai, u varros përfundimisht edhe propaganda e Edi Ramës për komisione të posaçme për Shtetin Ligjor.

“Të gjithë ata që dyshuan se ER tjetër gjë thotë dhe tjetër gjë bën, morën përgjigje finale me votimin e djeshëm, ku për herë të dytë Rama refuzoi të ekzekutojë vendimet e Kushtetueses”.

Për Bardhin, shteti personal nuk ka asnjë lidhje me shtetin ligjor.

“Një vend kandidat për në BE dhe një vend anëtar i NATO-s ka shkelmuar para çdo shqiptari dhe ndërkombëtari parimet elementare të shtetit ligjor. Nga dje Shqipëria nuk ka asnjë dallim me vendet autoritare”.

“GPPD dënon me forcë aktin e djeshëm të Kuvendit dhe të Edi Ramës, për t’i dhënë statusin e paprekshme nga drejtësia bashkëpunëtores së tij dhe garanton se do të ndërmarrë çdo hap të nevojshëm për të mbrojtur demokracinë dhe shtetin ligjor”, ka shtuar Bardhi.

Çfarë ndodhi?

Mandati i Olta Xhaçkës nuk do të shkojë për shqyrtim në Gjykatën Kushtetuese.

Kështu ka vendosur Kuvendi i Shqipërisë përmes një votimi gjatë një seance maratonë, ku me 25 vota pro, 65 abstenim dhe 9 kundër, projektvendimi nuk kaloi.

Shumica socialiste në fakt, ndryshe nga hera e kaluar, këtë votim vendosi abstenimin në masë.

Vendimi u mor pas kalimit në votim në seancë plenare të dy raporteve, një nga opozita dhe tjetri nga mazhoranca, ku shtjellohej se Kuvendi duhet të votonte për një herë të dytë rreth mandatit të Xhaçkës.

Ndërkaq, kreu i Grupit Parlamentar demokrat, Gazment Bardhi, shprehu pakënaqësinë e tij pë mosleximin e raporteve në seancën maratonë. Akt ky, të cilin kryetarja e Kuvendit, Elisa Spiropali, e argumentoi përmes rregullores së Kuvendit, duke thënë se prej përfundimit të njëjtë, në të cilin raportet kanë dalë, nuk lind nevoja të lexohen ato në seancë.

Vetë Xhaçka nuk pati reagimi gjatë seancës apo votimit dhe duket se ka preferuar heshtjen këtë herë, lidhur me çështjen. Ajo as nuk votoi lidhur me mandatin e saj.

Teksa, Spiropali, në mbyllje të seancës, bëri me dije se do t’i drejtohet Komisionit të Venecias pë opinion lidhur me çështjen, duke parë edhe abstenimin e shumicës socialiste në Parlament.

Kushtetuesja më 10 korrik u shpreh se Kuvendi nuk ka respektuar vendimmarrjen e mëparshme të Gjykatës, në kundërshtim me detyrimin kushtetues që buron nga neni 132.

“Grupi Parlamentar i Partisë Demokratike ka kërkuar thirrjen e Kuvendit në një sesion të jashtëzakonshëm për zbatimin e vendimit nr. 1, datë 23.01.2023 dhe nr. 55, datë 10.07.2024 të Gjykatës Kushtetuese dhe dërgimin në Gjykatën Kushtetuese të mocionit për papajtueshmërinë e mandatit të deputetes, Olta Xhaçka”.

Deputetët e opozitës theksojnë se është e papranueshme mbrojtja politike dhe pengimi ndaj drejtësisë që mazhoranca po bën për rastin e ish-ministres dhe deputetes Xhaçka – duke injoruar Kushtetutën dhe duke penguar zbatimin e dy vendimeve të Gjykatës Kushtetuese.

“Ne dënojmë me forcë standardin një drejtësi për Edi Ramën dhe një drejtësi tjetër për gjithë të tjerët”.

“Në çdo vend demokratik zbatimi i vendimeve të Gjykatës Kushtetuese është i detyrueshëm dhe themeli mbi të cilin ngrihet një shtet ligjor”, shkruhet në letrën e deputetëve të opozitës drejtuar kryetares së Kuvendit, Elisa Spiropali.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.