Ministri i Shëndetësisë së Kosovës, Rifat Latifi, papritmas i është nënshtruar një operacioni kirurgjik nga apendisiti. Gjithësesi vizita e homologes së tij nga Shqipëria, Ogerta Manasterliu do të realizohet sipas agjendës së planifikuar.
Në mungesë të Latifit, Manastirliu do të pritet nga zëvendësministrat e Ministrisë së Shëndetësisë, Dafina Gexha-Bunjaku e Arsim Berisha, ka treguar për Albanian Post, zëdhënësi i ministrisë, Faik Hoti.
Albanian Post merr vesh se në këtë takim ndërmjet dy ministrive do të diskutohet për intensifikikimin e marrëdhënieve ndërmjet Shqipërisë dhe Kosovës falë marrëveshjeve të reja që priten të diskutohen.
Pas diskutimeve që do të bëhen këtë të premte, këto marrëveshje do të firmosen në mbledhjen e përbashkët të dy Qeverive e cila do të mbahet më 24 qershor.
Çka parashikojnë marrëveshjet?
Ngritjen e një komiteti të përbashkët ndërmjet dy ministrive të shëndetësisë së dy vendeve, për të hartuar protokollin për ofrimin e shërbimeve shëndetësore të specializuara nga mjekët e Shqipërisë dhe Kosovës në zonën kufitare.
Lidhur me urgjencat mjekësore dhe shërbime të specializuara, do të ketë trajtim të ndërsjellë në spitalet e Kukësit, Gjakovës dhe Prizrenit, për qytetarët e Shqipërisë dhe Kosovës bazuar në protokollin e bashkëpunimit mes spitaleve.
Shkëmbimi i mjekëve dhe profesionistëve të shëndetit në funksion të menaxhimit sa më të mirë klinik të rasteve specifike në dy anët e kufirit do të jetë një tjetër hap konkret drejt përmirësimit të shërbimit shëndetësor në këto zona.
Palët do të angazhohen të krijojnë një korridor mbështetje në rast nevoje, në shkëmbimin e ndërsjellë të barnave, testeve apo produkteve mjekësore.
Forcimi i bashkëpunimit në fushën farmaceutike do të formalizohet me marrëveshjen e përbashkët mes dy agjencive të barnave në lidhje me sigurinë dhe kontrollin e cilësisë së barnave dhe pajisjeve mjekësore. Kjo do të arrihet duke shkëmbyer eksperiencat mes profesionistëve, si edhe duke vënë në dispozicion laboratorët e kontrollit të barnave për ngritjen e kapaciteteve dhe forcimin e farmakovigjilencës në të dy vendet.
Agjenda e planifikuar nga Ministria e Shëndetësisë në Kosovë
Takimi i dy delegacioneve të shëndetësisë pritet të filloj në ora 11:00 në hapësirat e Ministrisë së Shëndetësisë në Kosovë.
Në ora 12:00 është planifikuar një konferencë për media.
Pas konferencës, delegacioni nga Shqipëria do të vizitojë Spitalin e fëmijëve “Sheikha Fatime” në QKUK.
Gjatë qëndrimit në Kosovë, ministrja Manastirliu do të ketë takime edhe me zyrtarë të tjerë nga Qeveria.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
