Lajme

Macron gjen kompromisin mes RMV-së dhe Bullgarisë


Presidenti francez Emmanuel Macron ka deklaruar se është gjetur një zgjidhje kompromisi për kuadrin e negociatave për anëtarësimin në Bashkimin Evropian për Maqedoninë e Veriut, ku do të përfshihej edhe Bullgaria.

Lajmi u bë i ditur nga agjencia “Reuters”, përcjell Albanian Post.

“Mendoj se kemi gjetur një zgjidhje kompromisi”, deklaroi ai gjatë një konference shtypi në samitin e NATO-s në Spanjë.

Parlamenti i Bullgarisë votoi të premten e 24 qershorit për heqjen e vetos, që ka bllokuar prej kohësh negociatat e anëtarësimit në Bashkimin Evropian (BE) me Maqedoninë e Veriut dhe Shqipërinë.

Kjo, duke ngjallur shpresa të reja se blloku tani mund të vazhdojë me planet e tij të zgjerimit në Ballkanin Perëndimor në mes të luftës së Rusisë në Ukrainë.

Franca, e cila aktualisht mban presidencën e radhës të BE-së, kishte bërë përpjekjet e fundit këtë javë për të zgjidhur një mosmarrëveshje etnike dhe kulturore midis Bullgarisë dhe Maqedonisë së Veriut që ishte burimi i vetos.

Qeveria bullgare kishte insistuar që Maqedonia e Veriut të pranonte zyrtarisht se gjuha e saj kishte rrënjë bullgare.

Më tej, të pranonte në kushtetutën e saj një pakicë bullgare dhe të anulonte “gjuhën e urrejtjes” kundër Bullgarisë.

Autoritetet maqedonase u shprehën se identiteti dhe gjuha nuk ishin të hapura për diskutim.

Sipas propozimit francez, Maqedonia e Veriut duhet të pranojë në preambulën e Kushtetutës se bullgarët janë një nga etnitë konstituive të vendit.

Maqedonia e Veriut e bëri të qartë në një samit të enjten të liderëve të BE-së se propozimi francez ishte “i papranueshëm” në formën e tij aktuale.

Detajet

Me 170 vota pro, parlamenti bullgar pranoi propozimin e Partisë Demokratike për t’i dhënë mandat Këshillit të Ministrave.

Kjo, për të pranuar propozimin e presidencës franceze për Maqedoninë e Veriut.

Kuvendi Kombëtar konfirmon kushtet në të cilat Bullgaria mund të mbështesë çdo hap në procesin e integrimit evropian të Maqedonisë së Veriut.

Përkatësisht: Zbatimi efektiv i Traktatit të Miqësisë, Fqinjësisë së Mirë dhe Bashkëpunimit të vitit 2017 dhe procesverbalet e mbledhjeve të Komisionit Ndërqeveritar sipas këtij Traktati; garantimi i të drejtave të bullgarëve në RMV, me përfshirjen e tyre në kushte të barabarta me popujt e tjerë në Kushtetutën e RMV-së.

Sakaq, ekzistencën e garancive evropiane në lidhje me plotësimin e kushteve të pikave 1 dhe 2.

Për këtë qëllim, Qeveria e Republikës së Bullgarisë duhet të miratojë draft kuadrin negociues dhe konkluzionet e Këshillit të BE-së të propozuara nga Presidenca Franceze.

Kjo, me disa kushte: Sqarimi i tekstit të projekt-konkluzioneve të Këshillit, në mënyrë që të sigurohet përfshirja e bullgarëve në Kushtetutën e RMV-së në dispozitat në të cilat përmenden popujt e tjerë dhe në baza të barabarta me këta popuj.

Kushti i dytë ka të bëjë me përmirësimin e draft kornizës negociuese të propozuar dhe draft konkluzioneve të Këshillit për të pasqyruar më qartë faktin se asgjë në procesin e anëtarësimit të Maqedonisë së Veriut në BE nuk mund të interpretohet si njohje nga Republika e Bullgarisë të ekzistimit të gjuhës maqedonase.

Së treti, përfshihet garancia se fqinjësia e mirë mbetet një kriter horizontal gjatë gjithë procesit të anëtarësimit.

Fjala e fundit i takon Këshillit të Ministrave dhe kryeministrit bullgar.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore