LVV: Serbia mund të provojë sërish aneksimin e veriut, koha për sanksione

Lëvizja Vetëvendosje (LVV) ka publikuar të martën një video përmbledhëse në rrjetin social “Facebook”, fiks një muaj pas sulmit terrorist të paramilitarëve serbë në fshatin Banjë të Zveçanit – komunë e banuar me shumicë serbe – në pjesën veriore të Kosovës, ku ka mbetur i vrarë Afrim Bunjaku, pjesëtar i Policisë së Kosovës.

Në videon përmbledhëse të subjektit më të madh politik në vend që drejton Qeverinë e Kosovës, thuhet se sulmi i armatosur e vdekjeprurës nga njësitet profesionale e të përgatitura në Banjë të dielën e 24 shtarorit, ka zhveshur pretendimet territoriale të Serbisë mbi Kosovën, derisa është kërkuar edhe vendosja e sanksioneve ndaj Serbisë për agresionin e shfaqur.

Gjithashtu, aty thuhet se Serbia mund të provojë skenar të ngjashëm sërish, por përgjigja do të jetë edhe më vendimtare. Në videon e LVV-së ndër të tjera theksohet se shteti serb është demaskuar  në të gjitha elementet dhe se ajo s’do dialog, s’do paqe dhe nuk është e gatshme të jetë e barabartë Kosovën.

“Policia e Kosovës e kontrollon secilën pjesë të territorit të Republikës së Kosovës. Menduan që vetëm mund të hyjnë dhe nuk i prekë askush në synimet e tyre terroriste. U zhgënjyen. U zhgënjyen edhe të tjerët që thoshin nuk shkoni më atje, nuk guxoni më e kështu me radhë”.

Shtetet e Bashkuara të Amerikës (SHBA) dhe Bashkimi Evropian (BE), përveç dënimit të sulmit terrorist të 24 shtatorit, kanë kërkuar bashkëpunimin e plotë të Serbisë në hetimin e ngjarjes së tmerrshme në Banjë, duke përfshirë ndjekjen penale dhe ekstradimin e personave përgjegjës në duart e drejtësisë kosovare, pa vonesa të mëtejshme.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.