![](https://albanianpost.com/wp-content/uploads/2024/06/vv.jpg)
Lëvizja Vetëvendosje (LVV), në ditëlindjen e saj, pretendoi nëpërmjet një postimi në “Facebook” se përgjatë qeverisjes tre vjeçare, vendi shënoi progres të madh demokratik dhe rritje akoma më të madhe ekonomike.
Në 19-vjetorin e themelimit, partia në pushtet lavdëroi veten, duke theksuar se Kosova përjetoi edhe shpërndarje të gjerë sociale. Ajo premtoi “suksese të reja” për shoqërinë e shtetin. E rrugëtimin 19-vjeçar, kjo parti e cilësoi me sfida e vështirësi, ndërsa shtoi se pas “përkushtimit në punë” u shndërrua në subjektin më të madh politik në vend tash e tri vite qeverisje të Kosovës.
“Rrugëtimi 19 vjeçar ka qenë përplot me sfida e vështirësi por me përkushtim, besim dhe punë, kemi fituar mbështetjen e popullit duke u shndërruar në subjektin më të madh politik në vend që tash e tri vite qeverisë me vendin. Me qeverisjen tonë vendi ka përjetuar progresin më të madh demokratik, ka shënuar rritjen më të madhe ekonomike…”, konsideroi ajo.
“Bashkë me popullin tonë të dashur, me rininë e tij, gratë, mërgatën, do të vazhdojmë drejt arritjeve dhe sukseseve të reja, për shoqërinë dhe vendin tonë, për ngritjen tonë dhe të gjithsecilit, për ngritjen e Republikës së Kosovës. Urime dhe gëzuar 19 vjetori i Lëvizjes VETËVENDOSJE!”.
Kosova megjithatë vazhdon të ketë probleme të mëdha ekonomike. Në opozitë e akuzojnë ekzekutivin kosovar për politika të gabuara ekonomike, ndërsa gjithashtu vlerësojnë se dhjetëra mijëra qytetarë, kryesisht të rinj të papunë e profesionistë të dëshpëruar, janë duke ia kthyer shpinën vendit të tyre për të nisur jetë të re në shtetet perëndimore për shkak të keqqeverisjes.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com