Lufta në Etiopi: Grabitën depot ushqimore, OKB-ja ndalon ndihmën në dy qytete

Programi Botëror i Ushqimit (WFP) ka pezulluar shpërndarjen e ndihmave ushqimore në dy qytete të Etiopisë Veriore, pasi persona të armatosur plaçkitën magazinat e tyre.

Sipas Kombeve të Bashkuara grabitësit nga forcat rebele tigrayan-e mbajtën personelin e ndihmës nën kërcënimin e armëve në qytetin Kombolcha.

Ata vodhën sasi të mëdha të furnizimeve ushqimore thelbësore – duke përfshirë disa për fëmijët e kequshqyer.

Etiopia Veriore po përballet me urinë masive në mes të një lufte civile të vazhdueshme midis tigrayan-ëve dhe forcave qeveritare.

Pas më shumë se një viti luftimesh, më shumë se nëntë milionë njerëz kanë nevojë për furnizime kritike ushqimore në rajonet Tigray, Amhara dhe Afar.

Një zëdhënës i OKB-së, që drejton WFP-në, tha se stafi i tij atje ishte përballur me “kanosje ekstreme” gjatë ditëve të grabitjeve në qendrën industriale të Kombolcha-s në Amhara.

Ai shtoi se: “Ngacmimi i tillë i personelit humanitar nga forcat e armatosura është i papranueshëm. Ai minon aftësinë e Kombeve të Bashkuara dhe të gjithë partnerëve tanë humanitar për të ofruar ndihmë kur është më e nevojshme”.

Zëdhënësi akuzoi gjithashtu personelin ushtarak për komandimin e tre kamionëve humanitar të WFP-së dhe përdorimin e tyre për qëllimet e tyre.

Kjo çoi në vendimin për të ndaluar shpërndarjen e ushqimit në Kombolcha dhe Dessie, dy qytete strategjike në Amhara që ndodhen në rrugën drejt kryeqytetit Addis Ababa.

Rebelët tigrayan nuk i kanë komentuar pretendimet se luftëtarët e tyre vodhën ndihma ushqimore.

Qeveria etiopiane kohët e fundit njoftoi se kishte rimarrë qytetet nga rebelët tigrayan-ë. Por, këta të fundit thanë se ushtria kishte rimarrë vetëm zonat që ata kishin braktisur.

OKB-ja ka konfirmuar më herët se ky konflikt ka vrarë mijëra njerëz, ka zhvendosur më shumë se dy milionë dhe ka çuar qindra mijëra në kushte të ngjashme me urinë.

Nga ana tjetër, OKB-ja ka hasur në pengesa të mëdha në dërgimin e ndihmave në zonat e prekura, ndërkohë që ka pasur një ndërprerje të komunikimit në Tigray, kështu që është e pamundur të dihet shkalla e vërtetë e vuajtjes.

Gati 200 fëmijë nën moshën pesë vjeç vdiqën nga uria në 14 spitale në Tigray nga fundi i qershorit deri në tetor, sipas agjencisë së lajmeve franceze “AFP” duke cituar të dhënat e mbledhura nga mjekët dhe studiuesit në Tigray.

Midis 16% dhe 28% e fëmijëve në të tre rajonet vuanin nga kequshqyerja sipas një deklratë të dhënë nga OKB muajin e kaluar.

Edhe më alarmante, deri në 50% e grave shtatzëna dhe nënave të kontrolluara në Amhara dhe Tigray u zbuluan se ishin të kequshqyera.

Luftimet shpërthyen më shumë se një vit më parë midis trupave qeveritare dhe Frontit Çlirimtar Popullor Tigray (TPLF), i cili dominoi Etiopinë për dekada dhe tani kontrollon pjesën më të madhe të Tigray.

Kryeministri Abiy Ahmed dërgoi trupa në rajonin Tigray për të shuar TPLF-në pasi tha se kishte sulmuar kampet e ushtrisë.

Por, rebelët u rikthyen, duke rimarrë pjesën më të madhe të Tigray-it dhe duke përparuar në rajonet fqinje të Amhara dhe Afar.

Zëdhënësi i Departamentit të Shtetit të SHBA-ve, Ned Price, tha se katastrofa humanitare në Etiopinë Veriore mbetet një “prioritet absolut” për Shtetet e Bashkuara.

Ai u bëri thirrje të dyja palëve të negociojnë një fund të konfliktit dhe të lejojnë që ndihma të arrijë tek ata në nevojë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.