Lëvizja Socialiste për Integrim ka dorëzuar pranë Prokurorisë së Posaçme kundër Korrupsionit dhe Krimit të Organizuar (SPAK), një kallëzim penal për ish-funksionarin e kësaj partie, i cili ka mbajtur edhe postin e ministrit të Mjedisit në vitet 2013-2017, Lefter Koka.
Kreu i Bashkisë së Fierit, Armando Subashi, është kallëzuar po ashtu në SPAK nga socialistët e qendrës. E njëjta gjë shkon edhe për ish-sekretarin e Përgjithshëm të Ministrisë së Mjedisit, Alqi Bllako.
Akuza e LSI-së lidhet me pretendimet për shkelje në ndërtimin e inceneratorit të Fierit.
Gjashtë, janë arsyet e aktit të ndërmarrë nga LSI.
E para lidhet me emërtimin e procedurës. Sipas kryetares së partisë, Monika Kryemadhi, ajo është publikuar si “Tender Kombëtar”, kur realisht duhej të ishte “Tender i hapur ndërkombëtar”.
Së dyti, sipas saj, ka ndryshuar vendi ku do të ndërtohej inceneratori. Së treti, pas firmosjes së kontratës, ka ndryshuar një nga anëtarët e bashkimit të shoqërive, sipas pretendimeve nga LSI.
Arsyeja e katërt lidhet me afatin e zgjatur të punimeve. E pesta me publikimin e procedurës dhe e gjashta me zhvendosjen – e pretenduar e jashtëligjshme – e inceneratorit.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
