Lojërat Olimpike të Pekinit – atletët ankohen për kushtet e izolimit

Komiteti Olimpik Ndërkombëtar ka deklaruar se kushtet e atletëve, të izoluar për shkak se kishin rezultuar pozitivë me coronavirus, nuk i kanë përmbushur pritjet.

Zyrtarët e ekipit gjerman u ankuan për akses të kufizuar në ushqim dhe internet gjatë karantinimit.

Drejtori ekzekutiv i Lojërave Olimpike, Christophe Dubi, tha se shumica e shqetësimeve për izolimin ishin adresuar, por pranoi se nevojiteshin përmirësime, pasi zyrtarët gjermanë i quajtën kushtet “të papranueshme”.

“Kjo nuk duhet të ndodhë dhe ne duam të sigurohemi që nuk do të ndodhë”, u tha Dubi gazetarëve të dielën.

Ai shtoi se organizatorët “nuk mund të jenë të vetëkënaqur”, ndërsa përpiqen t’i zhvillojnë Lojërat në përputhje me politikën e Pekinit për zero-COVID.

Shefi i misionit të ekipit olimpik gjerman, Dirk Schimmelpfennig, tha se ai po punonte me zyrtarët kinezë dhe IOC për të marrë tre atletë në ambientet e izolimit dhoma më të pastra, pajisje stërvitore, shpërndarje të rregullt të ushqimit dhe testeve PCR.

Rastet pozitive brenda sistemit të mbyllur për pjesëmarrësit e Olimpiadës, i cili është krijuar për të minimizuar transmetimin, ranë në vetëm 10 të shtunën, krahasuar me 45 një ditë më parë.

Por sfida e mbajtjes së flluskës ka shtuar tensionet në një ngjarje që është bërë një pikë kyçe e tensioneve midis Kinës dhe Perëndimit.

Disa vende perëndimore, duke përfshirë Shtetet e Bashkuara, Britaninë e Madhe, Kanadanë dhe Australinë, kanë bërë bojkot diplomatik të Lojërave për shqetësimet në lidhje me politikat e diskutueshme të Kinës në Xinjiang.

Antonio Guterres, sekretari i Përgjithshëm i OKB-së, tha të shtunën se ai pret që autoritetet të lejojnë një “vizitë të besueshme” në Kinë, duke përfshirë një ndalesë në Xinjiang, pas bisedimeve me Presidentin Xi Jinping dhe Wang Yi, sekretarin e jashtëm të Kinës, në Pekin.

Ndërkaq, Michelle Bachelet, komisionerja e lartë e OKB-së për të drejtat e njeriut, ka kërkuar qasje në rajon për të hetuar akuzat për abuzim për të paktën tre vjet.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.