“Lojërat Mesdhetare 2030”, Kurti: Do ndërtohet një stadium nacional – 10 objekte sportive do rinovohen

Kryeministri i Kosovës, Albin Kurti, ka thënë gjatë mbledhjes së Qeverisë se para e “Lojërave Mesdhetare 2030” që do mbahen në Kosovë do ndërtohet një stadium nacional.

Ai përmendi edhe investimet e tjera që do bëhen në fushën e sportit për t’u përgatitur për Lojërat Mesdhetare.

“Numri total i objekteve sportive në projektin fillestar është 24. 10 objekte sportive do të rinovohen, përfshirë Pallatin e Rinisë dhe Sporteve. Do të jenë katër ndërtime, përfshirë stadiumin nacional, kompleksin e pishinave, tenisit dhe poligonin shenjëtarisë”, tha Kurti

“Do bëhen pesë investime infrastrukturore të përkohshme dhe pesë projekte të tjera që janë në ndërtim apo përfundim, përfshirë stadiumin “Adem Jashari” në Mitrovicë dhe stadiumin në Gjilan”.

Kryeministri ka theksuar se “do mirëpresim mbi 5 mijë sportistë nga 21 shtetet anëtare të Komitetit Ndërkombëtar të Lojërave Mesdhetare”.

Kosova ka fituar të drejtën për organizimin e Lojërave Mesdhetare për vitin 2030.

Këtë e ka vendosur Asambleja e Përgjithshme e Komitetit Ndërkombëtar të Lojërave Mesdhetare (ICMG), e cila është mbajtur në Heraklion të Greqisë.

Kandidatura e Kosovës ka marrë 55 vota pro në Asamblenë e Përgjithshme të Komitetit Ndërkombëtar të Lojërave Mesdhetare, derisa tetë kanë qenë kundër dhe tri abstenime.

Për shtetin e Kosovës, kjo është një arritje tejet e madhe, pasi që në këtë kompeticion do të marrin pjesë 26 shtete nga tri kontinente, dhe priten që të marrin pjesë rreth 5 mijë sportistë.

Edicioni paraprak i Lojërave Mesdhetare ishte mbajtur në Oran të Algjerisë.

Kosova u pranua si anëtare e Komitetit Ndërkombëtar të Lojërave Mesdhetare në tetor të vitit 2015.

Për herë të parë mori pjesë në Lojërat Mesdhetare 2018, që ishin mbajtur në Tarragona të Spanjës.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.