Seanca 8, rezultati 0 – rrogat ju dalin nesër

Instituti Demokratik i Kosovës (KDI) ka reaguar pas dështimit të radhës për konstituimin e Kuvendit të Kosovës, duke thënë se përkundur bllokadës që ka paralizuar procesin e ngritjes së institucioneve të reja, pagat e deputetëve do të dalin nesër.

KDI ka theksuar se në tetë seancat e fundit konstituive – seanca e parë është zhvilluar më 15 prill – deputetët kanë “punuar” veç disa minuta pa arritur asnjë rezultat. “Tetë seanca, disa minuta punë, asnjë rezultat, e megjithatë… rrogat ju dalin nesër”.

Murati: Jemi të gatshëm për zgjedhje të reja, por nuk jemi të interesuar

Deputeti nga radhët e Lëvizjes Vetëvendosje, Hekuran Murati, pas dështimit të tetë të konstituimit të Kuvendit të Kosovës, ka thënë se ka deputetë individualë që kanë shprehur vullnetin për të dalë nga kjo situatë.

Por, sipas tij, votimi për Albulena Haxhiun si kryetare e Kuvendit nuk po lejohet të bëhet për shkak të qëndrimeve të partive politike.

“Ne kemi dëgjuar se disa deputetë individualë kanë shprehur vullnetin dhe dëshirën për të dalë nga kjo situatë nga opozita, duke votuar për të tejkaluar këtë bllokadë. Megjithatë, janë qëndrime politike të subjekteve të tyre që nuk i lejojnë ata të ndahen nga grupi parlamentar dhe nga vota uniforme që e kanë si grup”.

Ai ka thënë se Vetëvendosja nuk ka interes të shkojë në zgjedhje të reja.

“Skenari i fundit janë zgjedhjet e reja, ne nuk jemi të interesuar, por nëse duhet patjetër të shkojmë atje, ne jemi të gatshëm. Megjithatë, nuk jemi të interesuar të shkojmë atje”.

Krasniqi: Kjo është tallje me qytetarët, koha e sundimit njëpartiak ka përfunduar

Kreu i PDK-së, Memli Krasniqi, ka akuzuar LVV-në për keqpërdorim të vullntetit të qytetarëve dhe për bllokim të qëllimshëm të institucioneve, duke thënë se LVV-ja ka “mentalitet të imponimit” për shkak se ajo mund  të ketë të drejtë të propozojë, porse nuk mund që votat t’i marrë votat me zor.

“E para: demokracia funksionon me shumicë, jo me imponim. E dyta: institucionet janë të popullit, nuk janë të asnjë partie të veçantë. Dhe e treta: duhet ta kuptojnë të gjithë që koha e sundimit një partiak ka përfunduar. Sa më parë që t’i kuptojë LVV-ja këto tri çështje, aq më mirë për vendin”.

Bajrami: Pengmarrja e institucioneve nga LVV po i kushton qytetarëve, s’jemi pjesë e teatrit të tyre politik

Pas dështimit të tetë radhazi për konstituimin e Kuvendit të Kosovës, nënkryetarja e LDK-së, Hykmete Bajrami, ka kritikuar qasjen e Lëvizjes Vetëvendosje ndaj procesit të formimit të institucioneve, duke e quajtur “pengmarrje të institucioneve”.

“Është hera e gjashtë që zonja Haxhiu mori vetëm 54 vota dhe ata insistojnë në këtë kandidaturë duke u mbledhur çdo 48 orë”, tha Bajrami, duke e cilësuar qasjen e Vetëvendosjes si bllokuese dhe jo në funksion të gjetjes së një zgjidhjeje kushtetuese.

Ajo ritheksoi qëndrimin e LDK-së për të mbështetur një zgjidhje që respekton rendin kushtetues dhe rezultatin zgjedhor, por pa u bërë vegël e një subjekti tjetër.

“Ne e njohim të drejtën e të parit për të propozuar, mirëpo kjo nuk do të thotë që ne e bartim votën tonë te një subjekt tjetër, duke votuar sipas kërkesave të tyre.”

Sipas saj, Lëvizja Vetëvendosje është përgjegjëse për krizën aktuale institucionale.

“Pengmarrja e institucioneve nga LVV-ja është duke i kushtuar qytetarëve të Kosovës, ata po përballen me probleme të ndryshme dhe askush ato nuk po i adreson.”

Bajrami përfundoi duke shprehur keqardhje për situatën aktuale politike dhe bllokimin e institucioneve.

“Na vjen keq që jemi pjesë e këtij teatri, që besoj që është bërë mjaft për çdo qytetar të Republikës së Kosovës.”