Albanian Post | Shtëpia e së vërtetës

LIVE

Albanian PostRedaksia

Cakolli e quan “tallje me qytetarët” atë që po bën Kuvendi

Eugen Cakolli, nga Instituti Demokratik i Kosovës, ka kritikuar ashpër mungesën e vullnetit për konsituimin e kuvendit, duke e cilësuar tallje me qytetarët e Kosovës.

“Kuvendi vazhdon të tallet, jo vetëm me veten, por edhe me qytetarët. Edhe sot, një të diel, një tjetër seancë për pesë minuta ‘punë’ – pa asnjë ndryshim real. Me shumicën e deputetëve që vonohen pa asnjë ndjesi urgjence, sepse nuk kanë as ngutje, as vullnet për ta zgjidhur ngërçin”.

Cakolli gjithashtu theksoi se një marrëveshje e mundshme do të ishte e dukshme vetëm përmes ndryshimeve të qëndrimeve dhe deklaratave, veçanërisht nga Lëvizja Vetëvendosje.

“Nëse vjen marrëveshja, ajo do të paraprihet nga sinjale të qarta – deklarata të reja, ton tjetër, narrativë e ndryshuar – veçanërisht nga Lëvizja Vetëvendosje. Qoftë për formimin e institucioneve, qoftë për shkuarjen në zgjedhje”.

Albanian PostRedaksia

Murati: E kemi kryer obligimin kushtetuese, s’mund të bëjmë më shumë

Deputeti i Lëvizjes Vetëvendosje, Hekuran Murati, ka theksuar se partia e tij ka përmbushur obligimin kushtetues duke propozuar Albulena Haxhiun për kryetare të Kuvendit të Kosovës. Sipas tij, mosvotimi i saj dhe ngërçi aktual nuk janë përgjegjësi e LVV-së, por e atyre që kundërshtojnë propozimin.

“Ne kemi kryer obligimin tonë kushtetues, duke propozuar kandidatin për kryetar dhe duke votuar për. Ata që thonë se po bllokohet nga të gjithë dhe të gjithë duhet të ndajnë përgjegjësinë e kanë gabim. Bllokada s’bëhet me votë për. Ne përtej saj s’mund të votojmë vota të tjera”, ka thënë ai.

Albanian PostRedaksia

Bajrami citon Einsteinin

Deputetja e Lidhjes Demokratike e Kosovës, Hykmete Bajrami, ka cituar një thënie të shkenctarit të shquar gjerman Albert Einstein për të përshkruar ngërçin aktual në Kuvendin e Kosovës.

Ajo ka thënë se LDK-ja nuk ka votë as për Albulena Haxhiun dhe as për ndonjë kandidat tjetër. Prandaj ka shtuar se Lëvizja Vetëvendosje duhet ta ndërrojë kandidatin për kryeparlamentar.

“Jam këtu për të shprehur shqetësimin e LDK-se që LVV-ja për herën e shtatë pengoi konstituimin e Kuvendit të Kosovës. Einstein e ka thënë shumë qartë se është çmenduri të përsëritësh veprimin e njëjtë dhe të presësh rezultat ndryshe”.

Albanian PostRedaksia

Krasniqi: Kurti s’ka numra, prandaj e bllokon Kosovën

Kryetari i Partisë Demokratike të Kosovës, Memli Krasniqi, ka deklaruar se ngërçi aktual lidhet më shumë me kryetarin e Lëvizjes Vetëvendosje, Albin Kurti, i cili nuk i ka votat për t’u zgjedhur sërish kryeministër, sesa me kandidaten për kryetare të Kuvendit të Kosovës.

“Unë do të doja që sa më shpejt të kalonim në hapat e zgjedhjes së qeverisë. Kjo bllokadë më shumë se për Albulena Haxhiun është për Albin Kurtin, sepse nuk po mund të bëhet kryeministër. Duke mos dashur të bllokohet te emri i tij e sakrifikon Albulena Haxhiun. Por, kështu po e bllokon edhe shtetin e qytetarët duke na lënë pa institucione legjitime”, ka thënë ai.