Haradinaj: Letra e Kurtit drejtuar LDK-së është vonuar

Deputeti i AAK-së, Ramush Haradinaj, ka komentuar përpjekjen e fundit të kryeministrit në detyrë, Albin Kurti, për të gjetur një zgjidhje pas bllokadës politike në vend, përmes një letre dërguar LDK-së ku kërkohet koalicion qeverisës. Haradinaj e cilësoi këtë iniciativë të vonuar dhe theksoi se ajo duhej të ndodhte menjëherë pas zgjedhjeve të 9 shkurtit.

“Është dashur menjëherë pas zgjedhjeve, jo të priten 90 ditë. Është situatë e rëndë në Kosovë, po i harrojmë temat e tjera. Rritja e çmimit të energjisë është bërë e rëndë për prodhuesit dhe ne jemi vend që importojmë shumë. Kanë me pas zor me i mbajt punëtorët, jemi duke humbur kohë, duhet të kujdeset dikush për ta,” tha Haradinaj pas dështimit të njëmbëdhjetë për konstituimin e Kuvendit.

Ai shtoi se për të zhbllokuar situatën, vendi ka nevojë për një kandidat që mund të pranohet edhe nga partitë tjera opozitare.

“Si fillim Kurti do ta jepte një shenjë të mirë që e ka ndërmend që të ecë përpara, duke gjetur një kandidat që LDK-ja mund ta votojë, PDK-ja ose ne,” u shpreh ai.

Murati: PDK-së, LDK-së dhe AAK-së i pengon më shumë Haxhiu se Lista Serbe

Deputeti i LVV-së, Hekuran Murati, ka akuzuar PDK-në, LDK-në dhe AAK-në për bllokimin e procesit të konstituimit të Kuvendit të Kosovës, duke shtuar se subjetet që në legjislaturën e kaluar ishin në opozitë më shumë e kanë problem emrin e Albulena Haxhiut sesa praninë dhe ndikimin e Listës Serbe.

“Ne e kemi thënë – Lista Serbe s’e ka vendin në Kuvendin e Kosovës. Por në vazhdimësi e kemi parë se si opozita nuk është se e ka pasur problem. Shumë më tepër e ka problem emrin e Albulena Haxhiut – një deputete e cila në vazhdimësi ka qenë e zëshme kundër Asociacionit të Komunave me Shumicë Serbe”.

Murati nënvizoi se këtë herë ekziston një mundësi për t’u shkëputur nga ndikimi i Listës Serbe, duke pasur parasysh praninë e deputetëve nga komuniteti serb që nuk janë pjesë e kësaj liste. Ai propozoi që nënkryetari i kuvendit të vijë nga radhët e tyre, duke përmendur Nenad Rashiçin si emrin e preferuar.

“Propozimi jonë është që Nenad Rashiç të përfaqësojë komunitetin serb në Kuvendin Kosovës. Ftojmë edhe deputetët e opozitës që në vend që të kundërshtojnë Albulena Haxhiun për kryeparlamentare, të na bashkohen që sëpaku nënkryetari të mos vijë nga Lista Serbe”.

Limaj: Tre partitë e mëdha duhet të gjejnë zgjidhje për ta nxjerrë vendin nga kriza

Kryetari i Nismës Socialdemokrate, Fatmir Limaj, u ka bërë thirrje tri partive të mëdha parlamentare që të marrin kohën e nevojshme dhe të gjejnë një zgjidhje politike për krizën aktuale institucionale. Në një deklaratë për media, Limaj tha se “tashmë janë bërë të gjitha ushtrimet dhe taktizimet që janë normale në politikë,” dhe se situata në Kuvend është “një pasqyrë e gjallë se cila është gjendja.”

“Ftesa ime është për tre partitë e mëdha që të marrin kohën e duhur sa t’u duhet dhe të gjejnë një zgjidhje. Tema është qeveria, jo vetëm kryetari i parlamentit. Duhet të ketë shumicë dhe ajo shumicë duhet të shpërfaqet menjëherë me zgjedhjen e kryetarit të parlamentit dhe të qeverisë,” tha Limaj.

Ai kritikoi përsëritjen e tentimeve për konstituimin e Kuvendit pa një zgjidhje të dakorduar: “Kjo këtu është një lloj reprize e panevojshme, duhet të gjenden rrugë dhe rrugët gjenden përmes marrëveshjeve politike, kompromiseve.”

Në rast se partia e parë nuk arrin të formojë shumicën, Limaj theksoi se përgjegjësia bie mbi të tjerët: “Nëse partia e parë nuk e bën shumicën, le ta bëjnë të tjerët shumicën. Përgjegjësinë e kanë tre partitë e mëdha për ta nxjerrë vendin nga kriza.”

Ai përmbylli se Nisma do të vazhdojë të japë kontributin e saj për të shmangur një krizë të thellë institucionale: “Kjo është ajo që ne mund të bëjmë tani për tani.”

I pyetur se a po bëhet gjithë kjo krizë për rolin e presidentit, ai tha se nuk po sheh kapacitete për të arritur deri te ajo pikë.

“Nuk po shoh kapacitete për me mbërri deri atje, të I shkojmë gjërave me rend”.

Më tej, kur ai u pyet se nëse do të kishte bashkëpunuar me Kurtin, ai tha se ftesat e asnjërit nuk i refuzon, dhe se Nisma do të jap kontributin për të zgjidhur këtë krizë institucionale.

Krasniqi: LVV-ja po e dhunon shtetin 

Kryetari i PDK-së, Memli Krasniqi, ka akuzuar Lëvizjen Vetëvendosje për, siç tha ai, dhunim të institucioneve të shtetit për shkak të mungesës së shumicës parlamentare.  Ai kritikoi shefin e LVV-së, Albin Kurti, për bllokimin e procesit të formimit të institucioneve, për shkak të mungesës së numrave.

“Për Albin Kurtin duket se Albulena Haxhiu është më e rendësishme se sa rreth 1 milion qytetarë që kanë votuar në zgjedhjet e 9 shkurtit. Por, në mungesë të shumicës për t’u bërë kryeministër, ai po luan me Haxhiun, duke e mbajtur atë si kandidaten e cila nuk ka kaluar, nuk kaloi, dhe s’do të kalojë as në të ardhmen”.

Krasniqi shtoi se LVV-ja nuk mund ta mbajë peng shtetin dhe, nëse vërtet synon të gjejë zgjidhje, duhet që të propozojë një kandidat tjetër për kryetar të Kuvendit të Kosovës. Ai siguroi se në rast të zhbllokimit të legjislativit, nëse LVV-ja dështon ta bëjë qeverinë, sipas tij, PDK-ja do t’i siguronte numrat e nevojshëm.