Lista Serbe ofendon Rashiçin: Djali i Kurtit s’ka legjitimitet të flasë për Asociacionin

Lista Serbe shpërtheu në ofendime ndaj ministrit për Komunitete dhe Kthim në Qeverinë e Kosovës, Nenad Rashiç, i cili të hënën shprehu gatishmërinë që të përfshihet në hartimin e një statuti për Asociacionit e Komunave me Shumicë Serbe në Kosovë, duke pretenduar se ai nuk i përfaqëson interesat e komunitetit serb dhe nuk ka legjitimitet popullor të flasë për këtë çështje.

Në një komunikatë për shtyp të postuar në “Facebook” të hënën gjatë ditës, partia kryesore e serbëve të Kosovës pretendoi se Rashiçi erdhi në postin e ministrit pas zgjedhjes personale të kryeministrit të Kosovës, Albin Kurti, prandaj nuk është përfaqësues legjitim i serbëve të Kosovës.

“Kush ju votoi? Në cilat zgjedhje? Kush ju dha autoritetin të flisni në emër të serbëve? Kush beson tek ju? Kujt i intereson mendimi yt kur jeni thjesht djali i Kurtit dhe nuk do të jesh kurrë përfaqësues i popullit serb? Kur njerëzit nuk kanë fytyrë dhe nder, nuk kanë frikë nga Zoti dhe nuk kanë turp, atëherë mund të presësh çdo gjë prej tyre”, pretendoi mes tjerash ajo.

“Derisa serbëve u mohohen të gjitha të drejtat, u ndalohen produktet dhe barnat serbe, u vidhen pronat, serbët e respektuar arrestohen pa prova dhe rrihen nga regjimi, Rashiç pi kafe me Kurtin dhe padyshim i miraton veprimet e tilla”, propagandoi partia destruktive serbe që vepron në Kosovë.

Rashiç, në një intervistë për agjencinë kosovare të lajmeve “Kosova Press” të hënën, shprehu gatishmërinë që të përfshihet në hartimin e një statuti për Asociacionit e Komunave me Shumicë Serbe në Kosovë. Ai shtoi se në draftstatutin e propozuar nga ndërkombëtarët për mekanizmin serb, ekzistojnë disa paqartësi, porse nuk bëhet fjalë për “bosnjëzimin” e Kosovës.

Ndryshe, themelimi i Asociacionit të Komunave me Shumicë Serbe konsiderohet obligim i pazbatuar, i cili buron nga marrëveshja e vitit 2013 në kuadër të dialogut për normalizimin e marrëdhënieve. Kjo është marrëveshja e vetme e dialogut që është ratifikuar nga Kuvendi i Kosovës me dy të tretat e votave dhe ka fuqinë ligjore të një marrëveshjeje ndërkombëtare.

Rashiç: Jam i gatshëm të kontribuoj në hartimin e statutit të Asociacionit

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.