Lista Serbe: “Mbrojtja Civile” dhe “Brigada e Veriut” as nuk ekzistojnë, janë vetëm imagjinatë e Kurtit

Lista Serbe ka reaguar pas vendimit të Qeverisë së Kosovës për t’i shpallur “Mbrojtjen Civile” dhe “Brigadën e Veriut” – dy organizatat kriminale që operojnë në Veri të Kosovës – si organizata terroriste.

Dy këto organizata të shpallura si terroriste së fundmi, sipas Listës Serbe, jo vetëm që nuk ekzistojnë, por janë pjesë e planit kryeministrit të Kosovës, Albin Kurtit për të krijuar një armik imagjinar, përmes së cilit arsyeton “vazhdimin e terrorit politik mbi serbët lokalë”.

“Po të mos ishte i rrezikshëm, ky aktivitet i Albin Kurtit dhe Xhelal Sveclës dhe ministrave të tjerë do të ishte qesharak. Megjithatë, planet që dalin nga ky vendim tregojnë se në vend të de-eskalimit me ftesë të gjithë bashkësisë ndërkombëtare dhe mbarë popullit serb, Kurti planifikon përshkallëzimin e mëtejshëm, shtypjen dhe forcimin e pushtetit parapolitik, okupues në Veri të vendit”, ka theksuar Lista Serbe.

Lista Serbe, përmes një komunikate për media të publikuar në faqen e tyre zyrtare në Facebook, ndër të tjera ka pretenduar se kryeministri Kurti “ka krijuar një sistem unik që nuk është gjë tjetër veçse një gjueti shtrigash në shekullin e 21-të, me anë të të cilit organizatat inekzistente, të cilat asnjëherë nuk janë parë publikisht, as nuk kanë marrë përgjegjësi për një sulm terrorist, shpallen organizata terroriste”.

“Duke pasur parasysh dhe duke dashur që Kurti të mos bëjë provokime të reja dhe të akuzojë serbët apo ndonjë organizatë të re imagjinare për këtë, dhe me këtë t’i japë vetes alibi për ‘persekutimin dhe frikësimin e serbëve’, kërkojmë nga KFOR-i dhe EULEX-i që urgjentisht vendosin forcat e tyre në të gjitha pikat nevralgjike në Veri të Kosovës dhe me veprime parandaluese të pengojnë Kurtin të realizojë planin e tij ‘djallëzor’ dhe të kërcënojë paqen në këto zona”, potencon ndër të tjera Lista Serbe.

Muaj më parë Albanian Post, duke u bazuar në burime diplomatike mirë të informuara, kishte raportuar për aktivitetin e këtij grupi nën emërtimin “Brigada e Veriut” si një forcë paramilitare i cili numëron rreth 300 anëtarë të armatosur mirë.

Mosha mesatare e tyre është rreth të 30-tave, dhe tashmë kanë nisur patrullimet në zona të caktuara.

Patrullimi, siç kishte muar AP, bëhet kryesisht natën.

Raporti i inteligjencës i cilëson ata si kërcënim akut për sigurinë dhe rendin në Kosovë.

Një pjesë e tyre konsiderohen që nuk janë me origjinë nga Kosova, por janë të ardhur nga Serbia, mbase edhe nga Republika Serbe e Bosnjë dhe Hercegovinës.

Pavarësisht që një pjesë e tyre lënë përshtypjen se mund të jenë nën ndikimin e alkoolit dhe substancave tjera, nga ana taktike konsiderohen që zotërojnë përgatitje të theksuar ushtarake.

Kush qëndron prapa tyre?

Të gjitha indikacionet çojnë drejt Bossit të grupit me inicialet M.R., që drejton një nga ski-rezortet në Kollashin.

Megjithatë, sipas burimeve diplomatike, që për Albanian Post kanë komentuar raportin e EULEX-it, organizime dhe lëvizje të tilla të formacioneve të armatosura, nuk mund të ndodhin pa një aprovim të heshtur nga autoritetet e Serbisë.

Burimet diplomatike të AP-së kishin shprehur shqetësimin që elementë pro-rus, brenda strukturave shtetërore të Serbisë dhe jo vetëm, janë duke u angazhuar në funksion të përshkallëzimit, me synim final një konfrontim të armatosur.

Në rast të kësaj të fundit, ky zhvillim doemos që do të përfshinte edhe trupat e NATO-së në Kosovë.

Ekskluzive: 300 të armatosur në Veri, raportet e inteligjencës zbulojnë grupin paramilitar

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.