Lista Serbe kërkon “hetim” për dy terroristë të vrarë: Pse s’mori pjesë edhe EULEX-i, por vetëm Policia e Kosovës në operacion?

Lista Serbe, partia më e madhe e serbeve të Kosovës që dirigjohet nga Beogradi, ka kërkuar “llogari” nga bashkësia ndërkombëtare dhe EULEX-i, se përse nuk kanë marrë pjesë në operacionin e Policisë së Kosovës për arrestimin e terroristëve serbë në fshatin Banjskë të Zveçanit të dielën.

“Po ashtu, themi se do të kërkojmë hetim për vrasjen e së paku dy serbëve të vrarë gjakftohtë edhe pse janë dorëzuar. E pyesim bashkësinë ndërkombëtare, pse EULEX-i nuk mori pjesë në operacion, por vetëm policia e Kurtit?”, ka pyetur Lista Serbe përmes një reagimi.

“Në emër të Listës Serbe dhe të gjithë popullit serb nga Kosova shprehim ngushëllimet tona më të thella familjeve të serbëve të ndjerë dhe policit shqiptar të Kosovës në ngjarjen tragjike të djeshme në fshatin Banjskë të komunës së Zveçanit”.

Tutje, Lista Serbe ka bërë thirrje për vetëpërmbajtje, duke shtuar se “është e nevojshme që sa më parë të rivendoset paqja në rrugët tona, në këtë kuptim ne kemi nevojë urgjente që KFOR-i dhe EULEX-i të vendosen në Veri dhe të parandalojnë përshkallëzimin e mëtejshëm të situatës dhe të parandalojnë politikën”.

Lista Serbe ka pretenduar se Qeveria e Kosovës po vazhdon të ushtroj “presion mbi serbët”, prandaj edhe situata është përshkallëzuar.

“Kërkuam nga bashkësia ndërkombëtare që ta frenonte Kurtin, gjithmonë bënim thirrje për paqe, por kot. Fatkeqësisht, ndodhi ajo që dëshiroi Kurti”, ka pretenduar Lista Serbe.

Një pjesëtar i Policisë së Kosovës u vra, një u plagos dhe një tjetër u lëndua, pas një sulmi terrorist nga persona të armatosur në Banjskë të Zveçanit, rreth orës 3 të mëngjesit të së dielës.

Organet e rendit konfirmuan se tre sulmues janë vrarë dhe gjashtë të tjerë janë arrestuar, dy prej tyre të uniformuar dhe katër të tjerë që ndihmonin në operacion përmes radiolidhjeve.

Derisa pjesëtarët e tjerë të grupit terrorist dyshohet se janë arratisur duke kaluar në territorin e Serbisë.

Policia e Kosovës është duke vazhduar operacionin edhe gjatë së hënës.

Sipas informacioneve të fundit, Policia ka gjetur prova të reja, pajisje e materiale që janë konfiskuar në orët e fundit nga vendi i ngjarjes në të cilin për orë të tëra gjatë ditës së djeshme pati shkëmbime me armë zjarri.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.