Limaj: Po t’i jepet mundësia, Vuçiç do ta përsëriste Banjën

Kryetari i Nismës Socialdemokrate, Fatmir Limaj, ka thënë se po t’i jepej mundësia, Presidenti i Serbisë, Aleksandër Vuçiç, do ta përsëriste sulmin e Banjës, ku mbeti i vrarë rreshteri Afrim Bunjaku.

Këto komente, Limaj i ka bërë në një intervistë për “Euroneës Albania”, duke folur për masat që Vuçiç i shpalli për gjoja mbrojtjen e serbëve të Kosovës, të premten.

“Nuk ka çfarë të bëjë me tepër Vuçiç-i se ajo çfarë ka bërë në Banjë. Drejtpërdrejtë ka ushtruar agresion”, tha fillimisht Limaj.

Për ish-zëvendëskryeministrin nuk ka asnjë dilemë se sulmi terrorist i 24 shtatorit 2023 në Banjë, ka treguar në vepër konkretisht se çfarë Serbia mendon në raport me Kosovën.

“Ka qenë agresion i drejtpërdrejtë dhe po t’i jepet mundësia, rasti dhe hapësira… dëshiron të krijojë situata të tilla, ose hapësira të tilla, ai [Vuçiç] ëndërron për të pasur një lloj Banje”, shtoi.

Për këtë, Limaj përmendi parullat fashiste që i shfaqin serbët në raport me Kosovën, e të cilat kanë mbështetjen e politikës zyrtare serbe, përkatësisht krerëve të saj.

“Në të gjithë Serbinë, nga drejtuesit e tyre, ata vazhdojnë këngën e tyre: ‘Kur ushtria të kthehet në Kosovë’… d.m.th ata e ëndërrojnë dhe këtë ëndërr e ushqejnë fatkeqësisht te populli në Serbi duke shpresuar që një ditë ushtria serb të kthehet në Kosovë”.

Kreu i NISMA-s rikujton se asnjëherë politika zyrtare në Beograd nuk e ka fshehur një gjë të tillë.

“As Vuçiç e as politika zyrtare serbe. Ata punojnë dhe vazhdojnë të punojnë për të minuar e rrënuar shtetësinë e Kosovës”, potencoi ai ndër të tjera.

Çfarë ndodhi më 24 shtator?

Një grup i armatosur të dielën e 24 shtatorit të vitit të kaluar, sulmoi Policinë e Kosovës në Banjë të Zveçanit.

Autoritetet e Kosovës akuzuan drejtpërdrejtë Serbinë se qëndron prapa këtij sulmi terrorist, teksa Milan Radojiçiç – njeri i besuar i presidentit serb Aleksandër Vuçiç – ka marrë përgjegjësinë për këtë sulm.

Radojiçiç u arrestua nga autoritetet serbe, për t’u liruar një ditë më pas.

Vendet perëndimore, përfshirë Shtetet e Bashkuara të Amerikës dhe Bashkimi Evropian e kanë dënuar këtë sulm, derisa kanë kërkuar që përgjegjësit të sillen para drejtësisë.

Nga ana tjetër, Serbia nuk është distancuar nga ky sulm, përkundrazi ka shpallur ditë zie kombëtare, për t’i nderuar kështu terroristët e vrarë.

Përveç kësaj, Beogradi zyrtar, pas sulmit terrorist, dislokoi një numër të madh të trupave ushtarake përgjatë kufirit me Kosovën, për t’i larguar më pas, për shkak të presionit ndërkombëtar.

Për Radojiçiç-in dhe disa të tjerë, aktualisht ekziston edhe një urdhërarrest ndërkombëtar nga INTEPOL-i.

Po ashtu, Radojiçiç, së bashku me 44 terroristë të tjerë, kanë aktakuzë nga Prokuroria Speciale e Kosovës për sulmin në Banjë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.