![](https://albanianpost.com/wp-content/uploads/2024/05/Komisioni.png)
Ligji për zyrtarët publikë në Komisionin për Administratë Publike, Pushtet Lokal, Media dhe Zhvillim Rajonal ka përplasur sërish opozitën dhe pushtetin në mbledhjen e së martës.
Kjo pasi sipas opozitës përmes këtij projektligji po synohet të politizohet dhe të kapet administrata shtetërore.
Sipas deputetit të Lidhjes Demokratike të Kosovës (LDK), Agim Veliu, ky projektligj “është në kundërshtim me parimin e shërbimit civil”.
Ndërkaq, deputeti nga Aleanca për Ardhmërinë e Kosovës (AAK), Besnik Tahiri, apeloi të kenë kujdes në atë se çka dërgojnë për miratim.
Ai theksoi se ky ligj s’duhet të përfundojë sërish në Gjykatën Kushtetuese.
“Ne si Komision duhet të jemi të kujdesshëm. Jam i bindur që në formën që është duke shkuar ligji besoj që ky ligj do të përfundojë prapë në Gjykatë Kushtetuese dhe humbësja kryesore është Kosova”.
“Besoj qe duhet t’i japim kohë të gjitha komenteve që janë dhënë nga organizata të ndryshme faktorë të ndryshëm e nga Komisioni Evropian. Demokracia i ka rregullat e veta”, tha Tahiri para deputetëve.
Si LDK-ja, ngjashëm u deklaruan edhe nga Partia Demokratike e Kosovës.
“Përmes këtij projektligji për Administratën po synohet të politizohet dhe të kapet administrata shtetërore, duke shtuar se do ta kontestojnë me të gjitha mundësitë ligjore”, tha deputeti Isak Shabani.
Por, sipas partisë në pushtet ky ligj për zyrtarët publikë mundëson që gjeneratat e reja që të jenë pjesë e administratës, ndonëse “ka të meta”.
“Ky ligj mundëson që gjeneratat e reja të jenë pjesë e administratës. Ky ligj me të gjitha të metat që mund t’i ketë, është përpjekje e shkëlqyer për ta depolitizuar administratën”, deklaroi deputeti nga Lëvizja Vetëvendosje, Besim Muzaqi.
Gjykata Kushtetuese i kishte hapur rrugë dekretimit të Ligjit për Zyrtarët Publikë, por i kishte rrëzuar disa nene.
Për vlerësimin e kushtetutshmërisë së katër neneve në Kushtetuese e kishin dërguar deputetët e LDK-së dhe të PDK-së.
Partia Demokratike dhe Lidhja Demokratike e Kosovës, më 30 dhjetor të 2022 e kishin dërguar në Gjykatën Kushtetuese Ligjin për Zyrtarët Publikë.
Se pse Gjykata Kushtetuese duhet ta shfuqizojë ligjin në fjalë, e kishte argumentuar, ish-kryeministri i Kosovës dhe njëherit deputetë nga radhët e LDK-së, Avdullah Hoti.
Ai kishte thënë se me Ligjin e ri për Zyrtarët Publik shtohet ndikimi politik në rekrutim, transferim dhe ngritje në detyrë për shkak se hiqet sistemi i karrierës dhe rrjedhimisht punësimi bëhet me mandat dhe futet rekrutimi i jashtëm për pozitat drejtuese.
Lidhur me Ligjin për Zyrtarët Publikë, kishte reaguar edhe Zyra e Bashkimit Evropian në Kosovë.
Të njëjtit kishin shprehur shqetësim për disa dispozita të këtij ligji.
Zyra e BE-së në Kosovë gjithashtu ishte e zhgënjyer me faktin se pse Kuvendi i Kosovës nuk kishte marrë parasysh disa nga sugjerimet e tyre lidhur me Ligjin për Zyrtarët Publikë dhe Ligjin për Pagat.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com