Björn Höcke – një nga liderët më të shquar të ekstremit të djathtë të Gjermanisë – do të dalë para gjyqit për tu përballur me akuzat për përdorimin e parullave të ndaluara naziste në mitingje politike.
Përdorimi i sloganeve dhe simboleve nacionalsocialiste është një krim i dënueshëm në Gjermani, e cila, për shkak të trashëgimisë së ngritjes së Hitlerit në pushtet, ka një qasje shumë më kufizuese ndaj fjalës së lirë në krahasim me SHBA-të.
Höcke kryeson Alternativën e ekstremit të djathtë për Gjermaninë, e njohur me shkurtesën gjermane, AfD.
Si ai ashtu edhe dega shtetërore që ai drejton janë klasifikuar nga inteligjenca vendase si ekstremiste të krahut të djathtë dhe janë nën vëzhgim.
Ai po përballet me gjyqin për përdorimin e sloganit “Gjithçka për Gjermaninë” në një fjalim në shtetin lindor të Saksonisë, ku ai po gjykohet.
Höcke ka thënë se nuk e dinte që fraza ishte një slogan nazist. Por kritikët kanë këmbëngulur se argumenti nuk është i besueshëm, duke pasur parasysh se ai ishte mësues historie përpara se të bëhej politikan.
Dhe ata kanë vënë në dukje se politikanët e AfD-së në dy shtete të tjera tashmë janë ndaluar nga autoritetet në vitet e kaluara për përdorimin e sloganit.
Gjyqi do të zhvillohet në qytetin Halle, në gjykatën më të lartë të shtetit dhe pritet të zgjasë deri më 14 maj.
Nëse shpallet fajtor, Höcke mund të përballet me një burg të shkurtër ose një gjobë. Gjykata gjithashtu mund të vendosë t’i heqë përkohësisht të drejtën e tij për të votuar dhe kandiduar në zgjedhje.
Një vendim i tillë do të ishte një goditje e madhe gjatë një viti të rëndësishëm zgjedhor në Gjermani, në të cilin Höcke dhe AfD pritet të marrin pjesën më të madhe të votave.
Në të tre shtetet gjermane lindore që mbajnë zgjedhje më vonë këtë vit, AfD është partia më popullore. Dhe në mbarë vendin, ajo po bën sondazhe më të mira se cilado nga tre partitë qeverisëse, megjithë protestat masive mbarëkombëtare që shpërthyen pasi një raport hetimor zbuloi se disa anëtarë të AfD kishin marrë pjesë në një konferencë të fshehtë për të diskutuar deportimin e emigrantëve.
Ringjallja e fundit e AfD-së filloi pranverën e kaluar, kur ajo përfitoi nga ankthet për migrimin në rritje dhe zhgënjimi me trajtimin e dobët të qeverisë ndaj ekonomisë së vendit në stanjacion. Koalicioni qeverisës i kancelarit Olaf Scholz dukej i dobët dhe i ndarë.
Edhe pse nuk ka gjasa që AfD të jetë në gjendje të marrë pushtetin në një nga tre shtetet, Höcke është bërë një nga anëtarët më me ndikim të partisë së tij.
Analistët thonë se Höcke – një politikan aq i krahut të djathtë sa që një gjykatë e konsideroi të pranueshme ta quante fashist – jo vetëm që ia ka dalë ta shtyjë partinë e tij më djathtas, por edhe debatin më të gjerë politik, veçanërisht për çështje të tilla si migrimi.
Partia më e madhe e Gjermanisë, Kristian Demokratët konservatorë, ka mbajtur një qëndrim gjithnjë e më armiqësor ndaj imigracionit.
Partitë kryesore në të gjithë spektrin politik janë zotuar prej kohësh të mos punojnë me AfD-në dhe shumë prej tyre tani po kërkojnë rrugë ligjore për të frenuar ndikimin e partisë në mënyra që kanë ndezur debatin rreth asaj se sa mund të veprojë një demokraci kundër forcave që e minojnë atë.
Udhëheqësit e AfD si Höcke argumentojnë se ata janë bërë viktima të institucioneve shtetërore që abuzojnë me pushtetin e tyre për t’i mbyllur gojën.
Një orator i aftë, Höcke është përpjekur shpesh të rifusë fjalë dhe slogane të lidhura me Rajhun e Tretë, në atë që analistët e përshkruajnë si një strategji të dyfishtë.
Prokurorët javën e kaluar shtuan me sukses një akuzë të dytë kundër Höcke në gjyq.
Pasi u përball me akuzat për përdorimin e tij fillestar të sloganit, ai ngacmoi thirrjen në një tjetër tubim politik, duke i thirrur turmës “Gjithçka për –“ dhe duke i lënë mbështetësit të thërrasin fjalën e fundit, “Gjermaninë”.
Gjyqi pritet të tërheqë turma të mëdha protestuesish si pro dhe kundër AfD.
Höcke u ka bërë thirrje mbështetësve të tij që të vijnë në gjyqin e tij në një deklaratë në mediat sociale: “Ju ftoj të vini në Halle dhe të dëshmoni drejtpërdrejt gjendjen e të drejtave civile, demokracisë dhe shtetit të së drejtës në Gjermani”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
