Lideri francez i Republikanëve konfirmon pikën e kthesës në prag të zgjedhjeve: “Na duhet aleanca me Le Pen”

Në Francë po formohet një “koalicion Meloni”.

Presidenti i Republikanëve (LR), Éric Ciotti, ka njoftuar drejtpërdrejt në televizion se partia ka nevojë për “një marrëveshje me partinë Lëvizja Kombëtare” e Marine Le Pen, një vendim që Le Pen e përshëndeti si “një zgjedhje të guximshme”.

Megjithatë, lëvizja e Ciotti-t ka përçarë partinë, me disa senatorë që kanë kërkuar dorëheqjen e tij nga presidenca dhe ka shkaktuar irritim në qeveri, me ministrin e Brendshëm Gérald Darmanin që e quajti atë një “vendim të turpshëm”.

Marion Maréchal, menjëherë pasi kaloi pragun me 5.5% për listën Reconquête, kishte bërë thirrje për një “koalicion të të djathtave” sipas modelit italian, duke thënë: “Nëse në Romë të djathtat janë bashkuar dhe ka funksionuar, pse nuk mund ta bëjmë ne?”.

Reconquête, parti e themeluar më pak se tre vjet më parë nga Eric Zemmour, është aleate e Fratelli d’Italia në Bashkimin Evropian, një aleancë që kishte acaruar partinë e Le Pen.

Tani, megjithatë, urgjenca për të arritur pushtetin e bën të nevojshme bashkëpunimin, duke lënë mënjanë rivalitetet e vjetra dhe grindjet familjare. Maréchal, e cila ishte mbajtur larg nga tezja gjatë fushatës zgjedhore, mbërriti dje pasdite në selinë qendrore të Rassemblement National me qëllimin për të arritur një marrëveshje elektorale për të bashkuar forcat e së djathtës ekstreme franceze dhe për të kaluar nga 88 deputetët aktualë të Rn në 289 të nevojshëm për të siguruar një shumicë qeveritare.

Një projeksion i parë mbi votimin e Harris Interactive: Lëvizja Kombëtare mund të ketë ndërmjet 235 dhe 265 vende, duke fituar kështu një shumicë relative.

“Kemi një mundësi historike për të bashkuar patriotët që duan t’i japin fund politikave toksike të Emmanuel Macron”, theksoi mbrëmë në televizion Le Pen. Marrëveshja me Republikanët erdhi para asaj me Reconquête.

Disa deputetë të së djathtës kanë nisur diskutime, të shqetësuar për t’u spastruar nga një ciklon lepenist në zgjedhje. Të dielën, lista e Rn mori 8 milionë vota, një rekord absolut, duke kryesuar në të gjitha rajonet franceze, përfshirë Bretoninë, një bastion i së majtës.

Nga gjashtëdhjetë deputetët aktualë të Republikanëve, të paktën njëzet – sipas lepenistëve – do të tundohen të bëjnë hapin e madh. Në një sistem mazhoritar me dy raunde – votimi do të zhvillohet më 30 qershor dhe më 7 korrik – Sébastien Chenu, nënkryetari i Rn, propozon marrëveshje zonë për zonë, përmes “një platforme elektorale që i drejtohet të gjithëve”.

Nëse deri tani Le Pen kishte dashur gjithmonë të kandidonte e vetme, duke refuzuar çdo aleancë, delfini i saj Jordan Bardella ka imponuar një ndryshim strategjie.

28-vjeçari që e sheh veten tashmë kryeministër të një qeverie të ardhshme të së djathtës, ka shpjeguar se dëshiron të krijojë një “koalicion sa më të gjerë të jetë e mundur”.

Edhe ai i drejton sytë nga Italia dhe nga Meloni, e cila dje dha sinjale bashkëpunimi.

“Rezultati i arritur në Francë nga partia e Le Pen në zgjedhjet evropiane ishte shumë i rëndësishëm”, komentoi kryeministrja.

“Kam thënë prej kohësh që rruga që po ndjek Le Pen është padyshim shumë interesante”. Bashkimi i të djathtave në Francë mund të krijojë një konfigurim të ngjashëm në nivel evropian me atë të qeverisë italiane, me një parti të lidhur me PPE (Republikanët), një me Konservatorët (Reconquête) dhe një me ID (Le Pen).

Strategjia e Macron-it ishte të befasonte lepenistët me kohë shumë të shkurtër për të nisur pushtimin e tyre të pushtetit, por ata pretendojnë se janë përgatitur për hipotezën e zgjedhjeve të parakohshme.

Është “Plani Matignon”, sipas emrit të selisë së ekzekutivit, Hotel Matignon: një listë me 577 emra kandidatësh. Të gjithë të gatshëm për të garuar në zgjedhjet legjislative. Kandidatët janë tani në shqyrtim nga drejtuesit e partisë dhe mund të ketë disa ndryshime në funksion të aleancave politike.

“Jemi të gatshëm të qeverisim”, vazhdon të përsërisë Le Pen.

Partia e saj ka kërkuar gjatë këtyre viteve të krijojë një klasë të re drejtuese, duke u bazuar në suksesin në zgjedhjet e fundit legjislative.

“Ka një shkollë formimi politik, kur partitë e tjera nuk e kanë më”, vëren Erwan Lecoeur, specialist i së djathtës ekstreme.

“Ata janë gjithashtu më të përgatitur për një fushatë të shpejtë si ajo që fillon – vazhdon Lecoeur – sepse kanë dy liderë të njohur dhe popullorë si Le Pen dhe Bardella, të cilët do të vendosin në fletushka dhe broshura, duke shmangur përfshirjen në program”.

Macronistët synojnë të ngjallin frikë, lepenistët të qetësojnë.

“E djathta ekstreme është varfërimi i francezëve dhe degradimi i vendit tonë”, tha Emmanuel Macron të dielën në mbrëmje.

“Programi i Rn do t’u kushtojë 100 miliardë euro francezëve” paralajmëroi dje ministri Gérald Darmanin.

Mazhoranca aktuale do të përforcojë frikën në botën ekonomike dhe financiare. Dje indeksi i Bursës së Parisit regjistroi një rënie të fortë prej 2,37% përpara se të reduktonte disi humbjet. Pasi S&P kishte ulur në fund të majit vlerësimin e Francës nga ‘AA’ në ‘AA-‘, ndikimi në spread-in dhjetëvjeçar midis Btp francez dhe Btp gjerman kishte mbetur i pandryshuar.

Dje spread-i u rrit, duke u ngjitur nga 47 në 53,60 pikë bazë. Lepenistët duan t’i përgjigjen duke paraqitur një ekip qeverisës ku mund të përfshihen edhe ministra teknikë dhe një program për “shërimin” e Francës.

Marrë nga La Repubblica, për Albanian Post

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.